ബോറിസ് ജോൺസണും ബുൾഡോസറിൽ; സാമൂഹിക മാധ്യമങ്ങളിൽ വൈറൽ ആയി വീഡിയോ

ഗാന്ധിനഗർ: ഇന്ത്യാ സന്ദർശനത്തിനിടെ ഗുജറാത്തിലെ ജെസിബി ഫാക്ടറി സന്ദർശിച്ച് ബ്രിട്ടീഷ് പ്രധാനമന്ത്രി ബോറിസ് ജോൺസൺ. ഗുജറാത്ത് മുഖ്യമന്ത്രി ഭൂപേന്ദ്ര പട്ടേലിനൊപ്പമാണ് അദ്ദേഹം ഫാക്ടറി സന്ദർശിച്ചത്. ഫാക്ടറിയിലെ പുതിയ ബുൾഡോസറുകളിൽ ഒന്നിൽ ചാടിക്കയറിയ ജോൺസൺ മാദ്ധ്യമപ്രവർത്തകർക്ക്  നേരെ കൈ വീശിക്കാണിച്ചു. ഇതിന്റെ വീഡിയോയാണ് സാമൂഹിക മാധ്യമങ്ങളിൽ പ്രചരിക്കുന്നത്.

#WATCH UK PM Boris Johnson along with Gujarat CM Bhupendra Patel visits JCB factory at Halol GIDC, Panchmahal in Gujarat

(Source: UK Pool) pic.twitter.com/Wki9PKAsDA

— ANI (@ANI) April 21, 2022

ഇന്ത്യാ സന്ദർശനത്തിന്റെ ഭാഗമായി ഇന്ന് രാവിലെയാണ് ജോൺസൺ ഗുജറാത്തിൽ എത്തിയത്. വ്യവസായി ഗൗതം അദാനി ഉൾപ്പെടെ ഉള്ളവരുമായി അദ്ദേഹം കൂടിക്കാഴ്ച നടത്തി. രാവിലെ അഹമ്മദാബാദില്‍ വിമാനമിറങ്ങിയ അദ്ദേഹത്തെ ഗവര്‍ണര്‍ ആചാര്യ ദേവവ്രതും ഗുജറാത്ത് മുഖ്യമന്ത്രി ഭൂപേന്ദ്ര പട്ടേലും ചേര്‍ന്നാണ് സ്വീകരിച്ചത്.

ബോറിസ് ജോണ്‍സണ്‍ നാളെ ഡല്‍ഹിയില്‍ പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തും. ഇരു രാജ്യങ്ങളും തമ്മിലുള്ള ബന്ധം കൂടുതല്‍ ശക്തിപ്പെടുത്തുക, സുരക്ഷാ സഹകരണം മെച്ചപ്പെടുത്തുക തുടങ്ങിയ കാര്യങ്ങളാണ് സന്ദര്‍ശനത്തിലൂടെ ബോറിസ് ജോണ്‍സണ്‍ ലക്ഷ്യമിടുന്നത്. പ്രതിരോധം, നയതന്ത്രം, സാമ്പത്തിക പങ്കാളിത്തം എന്നിവയെക്കുറിച്ച്‌ ജോൺസൺ മോദിയുമായി ചര്‍ച്ച നടത്തും. വിവിധ കരാറുകളില്‍ ഇരു രാജ്യങ്ങളും ഒപ്പുവയ്ക്കും.