ചെന്നൈ: പ്രശസ്ത സീരിയല് നടനും സംവിധായകനുമായ മധു മോഹന് അന്തരിച്ചുവെന്ന തരത്തില് പ്രചരിക്കുന്ന വാര്ത്തകളോട് പ്രതികരിച്ച് നടന്. അങ്ങനെ താന് ജീവിച്ചിരിക്കുന്നുവെന്ന വിവരം ആളുകള് അറിയുമല്ലോ എന്നാണ് നടന് പ്രതികരിച്ചത്. പബ്ലിസിറ്റി കൂട്ടാന് വേണ്ടി ഏതോ യൂട്യൂബ് ചാനലുകാര് കൊടുത്ത വാര്ത്ത ആണ് അതെന്നും സത്യാവസ്ഥ അറിയാന് ആളുകള് തന്നെ നേരിട്ട് വിളിക്കുന്നുണ്ടെന്നും നിലവില് ചെന്നൈയില് താമസിക്കുന്ന മധു പറഞ്ഞു.
താന് മരിച്ചോ എന്നറിയാന് തന്നെ തന്നെയാണ് മിക്കവരും വിളിക്കുന്നത്, അവരോടെല്ലാം ഞാന് മരിച്ചിട്ടില്ല എന്ന മറുപടി പറഞ്ഞുകൊണ്ടിരിക്കുകയാണ്. അത്തരം ഫെയ്ക്ക് വാര്ത്തകളുടെ പിറകേ പോകാന് സമയമില്ല. എന്തായാലും താന് ജീവനോടെ ഉണ്ട് എന്ന് ആളുകളെ അറിയിക്കാന് പറ്റിയെന്നതിനാല് ഈ പബ്ലിസിറ്റി വാര്ത്ത തനിക്കും നേട്ടമായെന്ന് മധു പറഞ്ഞു.
മലയാളത്തിലെ നിരവധി ജനപ്രിയ പരമ്പരകളില് അഭിനയിച്ചിട്ടുള്ള മധു നിരവധി പരമ്പരകള് സംവിധാനം ചെയ്യുകയും നിര്മ്മിക്കുകയും ചെയ്തിട്ടുണ്ട്.
