നിയന്ത്രണമില്ലാത്ത നിർമ്മിത ബുദ്ധി അഥവാ ആർട്ടിഫിഷ്യൽ ഇന്റലിജൻസ് (എഐ) ഭാവിയിൽ വൻ ദുരന്തങ്ങൾക്ക് വഴിവെക്കുമെന്നും ഇത് നൂറുകോടി മനുഷ്യരുടെ മരണത്തിന് വരെ കാരണമായേക്കാമെന്നും മുന്നറിയിപ്പ് നൽകി മൈക്രോസോഫ്റ്റ് സഹസ്ഥാപകൻ ബിൽ ഗേറ്റ്സും ‘എഐയുടെ പിതാവ്’ എന്നറിയപ്പെടുന്ന കമ്പ്യൂട്ടർ ശാസ്ത്രജ്ഞൻ ജഫ്രി ഹിന്റണും. എഐ സാങ്കേതികവിദ്യ വികസിപ്പിക്കുന്ന കമ്പനികളുടെ സ്വയം നിയന്ത്രണം മാത്രം പോരെന്നും, സർക്കാരുകൾ അടിയന്തരമായി ശക്തമായ നിയമനിർമ്മാണങ്ങളിലൂടെ ഇതിന് കടുത്ത സുരക്ഷാ മാനദണ്ഡങ്ങൾ കൊണ്ടുവരണമെന്നും എൻബിസിയുടെ ‘മീറ്റ് ദി പ്രസ്’ പരിപാടിയിൽ ബിൽ ഗേറ്റ്സ് ആവശ്യപ്പെട്ടു.
എഐ സാങ്കേതികവിദ്യ സ്വയം മനുഷ്യരാശിയെ ഇല്ലാതാക്കുമെന്നതിനേക്കാൾ ദുഷ്ടലാക്കോടെ പ്രവർത്തിക്കുന്ന വ്യക്തികളോ ഗ്രൂപ്പുകളോ ഇത് ദുരുപയോഗം ചെയ്യുന്നതാണ് ഏറ്റവും വലിയ അപകടമെന്ന് ഗേറ്റ്സ് ചൂണ്ടിക്കാട്ടി. മുൻപ് വൻകിട രാജ്യങ്ങളുടെ സൈബർ ആക്രമണ സംഘങ്ങൾക്ക് മാത്രം സാധ്യമായിരുന്ന തരം വിനാശകരമായ കാര്യങ്ങൾ ചെയ്യാനും പവർ ഗ്രിഡുകൾ തകരാറിലാക്കാനും ഇപ്പോൾ എഐ വഴി ചെറിയ സംഘങ്ങൾക്കുപോലും സാധിക്കുമെന്നത് അതീവ ഗുരുതരമായ ഭീഷണിയാണ്. ആറ്റോമിക് ആയുധങ്ങളെ നിയന്ത്രിക്കുന്നതിനേക്കാൾ സങ്കീർണ്ണമാണ് എഐ സാങ്കേതികവിദ്യയെ നിയന്ത്രിക്കൽ എന്നും അദ്ദേഹം കൂട്ടിച്ചേർത്തു.
അതേസമയം, എഐ സിസ്റ്റങ്ങൾ സ്വന്തമായി ലക്ഷ്യങ്ങൾ നിശ്ചയിച്ചു തുടങ്ങുന്നത് മനുഷ്യരാശിയുടെ പൂർണ്ണമായ നാശത്തിലേക്ക് നയിച്ചേക്കാമെന്നാണ് ജഫ്രി ഹിന്റൺ മുന്നറിയിപ്പ് നൽകുന്നത്. അന്തരീക്ഷത്തിലെ കാർബൺ ഡൈ ഓക്സൈഡിന്റെ അളവ് കുറയ്ക്കാൻ എഐയോട് ആവശ്യപ്പെട്ടാൽ, മനുഷ്യരെ ഇല്ലാതാക്കുകയാണ് അതിനുള്ള എളുപ്പവഴിയെന്ന് എഐ സ്വയം തീരുമാനിച്ചേക്കാമെന്ന ഉദാഹരണവും ഹിന്റൺ ചൂണ്ടിക്കാട്ടി. ഇത്തരം മോഡലുകൾ പൊതുജനങ്ങൾക്ക് ലഭ്യമാക്കുന്നതിന് മുൻപ് ഔഷധങ്ങൾ പരിശോധിക്കുന്നത് പോലെ സ്വതന്ത്ര ഏജൻസികളെക്കൊണ്ട് കർശനമായി പരിശോധിക്കണമെന്നും, നിയമനിർമ്മാണത്തിന് അമേരിക്കൻ കോൺഗ്രസിന് ഇനി ഒരു വർഷത്തെ സമയം മാത്രമേ ശേഷിക്കുന്നുള്ളൂ എന്നും അദ്ദേഹം ഓർമ്മിപ്പിച്ചു.
എഐ ഏജന്റുകൾ നിയന്ത്രണങ്ങൾ ഭേദിച്ച് സൈബർ ആക്രമണങ്ങൾ നടത്തുകയും വിവരങ്ങൾ ചോർത്തുകയും ചെയ്ത സംഭവങ്ങളെ തുടർന്ന് ഓപ്പൺ എഐ (OpenAI) തങ്ങളുടെ നൂതന മോഡലുകളുടെ പരിശീലനം താൽക്കാലികമായി നിർത്തിവെച്ചിരിക്കുകയാണ്. അപകടസാധ്യത മുന്നിൽ കണ്ട് ബെർണി സാൻഡേഴ്സ് ഉൾപ്പെടെയുള്ള യുഎസ് ജനപ്രതിനിധികൾ സുപ്പർ ഇന്റലിജൻസ് നിരോധിക്കാനുള്ള നിയമനിർമ്മാണങ്ങൾക്ക് ശ്രമിക്കുന്നുണ്ടെങ്കിലും, എഐ ഭീഷണികൾ വെറും കെട്ടുകഥയാണെന്ന് ആരോപിക്കുന്ന പ്രസിഡന്റ് ഡൊണാൾഡ് ട്രംപിന്റെ നിലപാടും രാഷ്ട്രീയ എതിർപ്പുകളും ശക്തമായ നിയമങ്ങൾ നിലവിൽ വരുന്നത് വൈകിപ്പിക്കുന്നു.
