ദിസ്പൂര്‍: ഹിന്ദു സമുദായം ‘മുസ്ലീം ഫോര്‍മുല’ പിന്തുടരണമെന്ന ഉപദേശവുമായി എഐയുഡിഎഫ്(അഖിലേന്ത്യ ഐക്യ ജനാധിപത്യ മുന്നണി) പ്രസിഡന്റ് ബദ്രുദ്ദീന്‍ അജ്മല്‍. ഹിന്ദു പെണ്‍കുട്ടികളെ നേരത്തേ വിവാഹം കഴിപ്പിക്കണമെന്നും നാല്‍പ്പത് വയസിന് ശേഷം വിവാഹം കഴിപ്പിച്ചാല്‍ കുട്ടികളെ എങ്ങനെയാണ് വളര്‍ത്തുകയെന്നും ബദ്രുദ്ദീന്‍ അജ്മല്‍ ചോദിക്കുന്നു.
മുസ്ലീം യുവാക്കള്‍ 20-22 വയസ്സില്‍ വിവാഹം കഴിക്കും, പെണ്‍കുട്ടികളും സര്‍ക്കാര്‍ അനുവദിച്ച 18 വയസിനുള്ളില്‍ വിവാഹം കഴിക്കും. എന്നാല്‍ അവര്‍ (ഹിന്ദുക്കള്‍) വിവാഹത്തിന് മുമ്പ് രണ്ടുമൂന്ന് ഭാര്യമാരുമായി ജീവിക്കും (നിയമപ്രകാരമല്ലാതെ). അവര്‍ അപ്പോഴൊന്നും കുഞ്ഞുങ്ങള്‍ക്ക് ജന്മം നല്‍കില്ല. ആസ്വദിച്ച് ജീവിച്ച് പണം സ്വരുക്കൂട്ടി വെക്കും അജ്മല്‍ പറയുന്നു.
നാല്‍പ്പത് വയസിന് ശേഷം മാതാപിതാക്കളുടെ നിര്‍ബന്ധത്തില്‍ അവര്‍ വിവാഹം കഴിക്കും, പക്ഷേ നാല്‍പ്പതാം വയസ്സില്‍ അവര്‍ക്ക് കുഞ്ഞുങ്ങളുണ്ടാകുമെന്ന് കരുതാനാകുമോ, ഫലഭൂവിഷ്ടമായ മണ്ണില്‍ വിതച്ചാലെ നല്ല വിളയുണ്ടാകൂ.അതിനാല്‍ പെണ്‍കുട്ടികളെ വിവാഹം കഴിപ്പിക്കുന്ന കാര്യത്തില്‍ അവര്‍ മുസ്ലിം ഫോര്‍മുല പിന്തുടരണമെന്നും ബി അജ്മല്‍ ഉപദേശിക്കുന്നു. 20-22 വയസ്സില്‍ യുവാക്കളെയും 18-20 വയസ്സില്‍ പെണ്‍കുട്ടികളെയും വിവാഹം കഴിപ്പിച്ചാല്‍ എത്ര കുഞ്ഞുങ്ങളുണ്ടാകുമെന്ന് കണ്ടറിയൂ എന്നാണ് അജ്മല്‍ ഹിന്ദുക്കളോട് പറയുന്നത്.
