ന്യൂയോര്ക്ക്: എലികളെ വെറുക്കുന്ന, രക്തദാഹിയായ ന്യൂയോര്ക്ക് പൗരനാണോ? എങ്കില് നിങ്ങള്ക്കിതാ എലികളുടെ ചക്രവര്ത്തിയാകാന് അവസരം.. ജോലി തസ്തിക: എലി ലഘൂകരണ ഡയറക്ടര്, ശമ്പളം: 1.2 ലക്ഷം ഡോളര് -1.7 ലക്ഷം ഡോളര്. ന്യൂയോര്ക്ക് നഗരത്തിലെ എലി വിരുദ്ധ പോരാട്ടത്തില് പങ്കാളിയാകാന് ക്ഷണിച്ചുകൊണ്ട് ഈയാഴ്ച ഭരണകൂടം പുറത്തിറക്കിയ പരസ്യം ശ്രദ്ധ നേടിയിരിക്കുകയാണിപ്പോള്.
നഗരത്തില് വര്ധിച്ചു വരുന്ന എലി ശല്യത്തിന് ശരിയായ പരിഹാരം തേടിയിറങ്ങുകയാണ് മേയര് എറിക് ആദത്തിന്റെ ഭരണകൂടം. ഏറെ നാളുകളായി ന്യൂയോര്ക്ക് നഗരം എലികളുടെ എണ്ണം ഏതുവിധേനയും കുറയ്ക്കാനുള്ള പരക്കം പാച്ചിലാണ്. എലി നിര്മാര്ജ്ജന പ്രക്രീയകളൊന്നും പൂര്ണമായി ഫലിക്കാതെ വന്നതോടെ പുതിയ ക്രിയാത്മക സംവിധാനം മെച്ചപ്പെടുത്തുന്നതിന്റെ ഭാഗമായാണ് പുതിയ ഉദ്യോഗാര്ത്ഥികളെ തേടി പരസ്യം പുറത്തിറക്കിയിരിക്കുന്നത്.
ഏതുവിധേനയും എലികളെ പിടിക്കാനുള്ള പുതിയ മാര്ഗങ്ങള് കണ്ടെത്തുന്ന ഉദ്യോഗാര്ത്ഥികള്ക്കാണ് അവസരം ലഭിക്കുക. എലികളുടെ രക്തത്തിനായി ദാഹിക്കുന്നവര് ആയിരിക്കണം, മാത്രമല്ല ഡാറ്റ ശേഖരണം, നൂതന സാങ്കേതിക വിദ്യ ആവിഷ്കരിക്കല്, ചവറ് നിര്മാര്ജ്ജനം തുടങ്ങിയ മേഖലകളില് പ്രവര്ത്തന ക്ഷമത മെച്ചപ്പെടുത്തി നഗരത്തില് എലികളുടെ എണ്ണം കുറയ്ക്കാനും ജനജീവിതം സുഗമമാക്കുകയുമാണ് പുതിയ തസ്തികയിലെത്തുന്നവരുടെ ജോലിയെന്നും പരസ്യത്തില് വ്യക്തമാക്കിയിട്ടുണ്ട്. പുതിയ തൊഴില് തസ്്തിക വിചിത്രമാണെങ്കിലും ജോലി ഭയപ്പെടുത്തുന്ന ഒന്നാണെന്നു പറയാതെ വയ്യ. അടുത്തിടെയായി നഗരത്തിലെ നടപ്പാതകളിലും പാര്ക്കുകളിലുമെല്ലാം എലിശല്യം വല്ലാതെ രൂക്ഷമായിരിക്കുകയാണ്. എലിപ്പെരുപ്പം തടയാന് ഭരണകൂടം നിരവധി മാര്ഗങ്ങള് പരീക്ഷിക്കുന്നുണ്ടെങ്കിലും ഇവയുടെ എണ്ണത്തില് കാര്യമായ കുറവ് വരുത്താന് ഇനിയും കഴിഞ്ഞിട്ടില്ല.
