ഡെല്ഹി: ലോകമഹാത്ഭുതങ്ങളിലൊന്നും ഇന്ത്യയുടെ അഭിമാന സ്മാരകവുമായ താജ്മഹലിന്റെ ചരിത്രം തിരുത്തണമെന്ന ഹര്ജി സുപ്രീംകോടതി തള്ളി. അനേകം നൂറ്റാണ്ടുകളായി അറിയപ്പെട്ടിരുന്നതുപോലെ താജ്മഹലിന്റെ ചരിത്രം തുടരാന് അനുവദിക്കണമെന്നും പൊതുതാല്പ്പര്യ ഹര്ജി തള്ളിക്കൊണ്ട് സുപ്രീംകോടതി വ്യക്തമാക്കി.
താജ്മഹലുമായി ബന്ധപ്പെട്ട തെറ്റായ വിവരങ്ങള് ചരിത്ര പുസ്തകത്തില് നിന്നും നീക്കുന്നതിന് ആര്ക്കിയോളജിക്കല് സര്വേ ഓഫ് ഇന്ത്യയ്ക്ക് നിര്ദേശം നല്കണമെന്നായിരുന്നു പൊതുതാല്പ്പര്യ ഹര്ജിയിലെ ആവശ്യം. സുപ്രീംകോടതിയുടെ ഡിവിഷന് ബെഞ്ചാണ് കേസ് പരിഗണിച്ചത്. താജ്മഹലിന്റെ ശരിയായ പഴക്കവും ചരിത്രവും 400 വര്ഷങ്ങള്ക്കു ശേഷം തീരുമാനിക്കാനാകുമോയെന്ന് ജസ്റ്റിസുമാരായ എം ആര് ഷാ, സി ടി രവികുമാര് എന്നിവരടങ്ങിയ ബെഞ്ച് കേസ് പരിഗണിച്ചുകൊണ്ട് ഹര്ജിക്കാരനോട് ചോദിച്ചു. മാത്രമല്ല എല്ലാ കാര്യങ്ങളിലും കോടതിയെ വലിച്ചിഴയ്ക്കരുതെന്നു കൂടി ഓര്മിപ്പിക്കുകയുണ്ടായി.
ചരിത്രത്തില് നിന്നും തെറ്റായ വസ്തുതകള് നീക്കണമെന്ന ഹര്ജിക്കാരന്റെ ആവശ്യത്തോട്, ശരിയായ വസ്തുതകള് നിങ്ങളാണോ തീരുമാനിക്കുന്നത്, അതോ കോടതിയുടെ ജോലിയാണോ എന്നും കോടതി ആരാഞ്ഞു. ഈ ആവശ്യം ഉന്നയിച്ച് ആര്ക്കിയോളജിക്കല് സര്വേ ഓഫ് ഇന്ത്യയെ സമീപിക്കാമെന്നും കോടതി വ്യക്തമാക്കി.
കഴിഞ്ഞ ഒക്ടോബറിലും സമാന രീതിയിലുള്ള ഹര്ജി കോടതിയിലെത്തിയിരുന്നു. എന്നാലതും പരിഗണിക്കപ്പെട്ടിരുന്നില്ല.
