ഖത്തറില് നടക്കുന്ന ലോകകപ്പ് ഫുട്ബോളിന്റെ ക്വാര്ട്ടറില് പോര്ച്ചുഗല് പുറത്തായതും സൂപ്പര് താരം ക്രിസ്റ്റ്യാനോ റൊണാള്ഡോയുടെ കണ്ണുനീരും ഒരു കായിക പ്രേമിയും മറക്കില്ല. അത്രയേറെ ആരാധകരുള്ള ഒരു താരം തന്റെ അവസാന ലോകകപ്പ് മത്സരത്തില് പകരക്കാരനായി ഇറങ്ങിയതിനെതിരെ വിമര്ശനങ്ങളും വിവാദങ്ങളും കൊഴുക്കുമ്പോള് താരത്തിന് പിന്തുണ അറിയിച്ച് ഇന്ത്യന് ക്രിക്കറ്റ് താരം വിരാട് കോഹ്ലി നേരിട്ട് രംഗത്തെത്തി. ‘നിങ്ങള് എല്ലാക്കാലത്തും വലിയവന്’ എന്നാണ് ക്രിസ്റ്റിയാനോയെ തന്റെ ഇന്സ്റ്റഗ്രാം പോസ്റ്റില് കോഹ്ലി വിശേഷിപ്പിച്ചിരിക്കുന്നത്.
ഫുട്ബോളിനും ഫുട്ബോള് ആരാധകര്ക്കും വേണ്ടി നിങ്ങള് ചെയ്തത് ഒരു ട്രോഫി കൊണ്ടും പദവികൊണ്ടും അളക്കാവുന്നതല്ല എന്ന് പറഞ്ഞ് തുടങ്ങിയ പോസ്റ്റില് ഫുട്ബോള് പ്രേമികള്ക്കിടയില് ക്രിസ്റ്റ്യാനോ ചെലുത്തിയ പ്രഭാവം ഒരു പദവി കൊണ്ടും വിശദീകരിക്കാനാവില്ല എന്നും ചൂണ്ടിക്കാട്ടി. ” നിങ്ങളുടെ കളി കാണുമ്പോള് എനിക്കും എന്നെപ്പോലെയുള്ള മറ്റ് ആരാധകരിലും നിങ്ങള് ചെലുത്തുന്ന സ്വാധീനം ഒരു പദവിയിലൂടെയും വിശദീകരിക്കാനാവില്ല, ദൈവത്തിന്റെ വരദാനമാണത്. ഹൃദയം കൊണ്ടുള്ള കളിയിലൂടെ ശരിയായ കഠിനാധ്വാനത്തിന്റെ, അര്പ്പണബോധത്തിന്റെ ആള്രൂപമായ നിങ്ങള് എല്ലാവര്ക്കും പ്രചോദനമാണ്” കോഹ്ലി കുറിപ്പില് വ്യക്തമാക്കി.
