ഭോപ്പാല്: ‘പ്രധാനമന്ത്രി നരേന്ദ്രമോദിയെ വധിക്കാന് തയ്യാറാകൂ’ എന്ന മധ്യപ്രദേശില് നിന്നുള്ള കോണ്ഗ്രസ് നേതാവിന്റെ പ്രസ്താവന വന് വിവാദത്തില്. മധ്യപ്രദേശിലെ മുതിര്ന്ന കോണ്ഗ്രസ് നേതാവും മുന്മന്ത്രിയുമായ രാജ പതേറിയ ആണ് പ്രധാനമന്ത്രിയെ വധിക്കാന് ആഹ്വാനം ചെയ്ത് പുലിവാല് പിടിച്ചത്. ഭരണഘടനയെ രക്ഷിക്കണമെങ്കില് പ്രധാനമന്ത്രി നരേന്ദ്രമോദിയെ വധിക്കണമെന്നായിരുന്നു ഒരു പ്രസംഗത്തില് അദ്ദേഹം പറഞ്ഞത്. എന്നാല് സംഭവം വിവാദമായതിന് പിന്നാലെ വധിക്കണമെന്നത് കൊണ്ട് പരാജയപ്പെടുത്തണമെന്നാണ് താന് ഉദ്ദേശിച്ചതെന്ന ന്യായീകരണവുമായി കോണ്ഗ്രസ് നേതാവ് രംഗത്തെത്തിയെങ്കിലും രാജ്യത്തെ പ്രധാനമന്ത്രിക്കെതിരെ കൊലവിളി മുഴക്കിയ പതേറിയയെ അറസ്റ്റ് ചെയ്യണമെന്ന് ആവശ്യപ്പെട്ടിരിക്കുകയാണ് ബിജെപി നേതാക്കള്.
സംഭവത്തില് പതേറിയക്കെതിരെ കേസെടുക്കാന് മധ്യപ്രദേശ് സര്ക്കാര് പോലീസിന് നിര്ദ്ദേശം നല്കിയിട്ടുണ്ട്. ഭാരത് ജോഡോ യാത്ര നടത്തുകയാണെന്ന് ഭാവിക്കുന്നവരുടെ യഥാര്ത്ഥ മുഖം പുറത്തുവന്നുകൊണ്ടിരിക്കുകയാണെന്ന് മധ്യപ്രദേശ് മുഖ്യമന്ത്രി ശിവരാജ് സിംഗ് ചൗഹാന് ആരോപിച്ചു. ഇന്നത്തെ കോണ്ഗ്രസ് മഹാത്മാഗാന്ധിയുടെ കോണ്ഗ്രസ് അല്ലെന്നും മുസ്സോളനിയുടെ ചിന്താഗതിയുള്ള ഇറ്റലിയിലെ കോണ്ഗ്രസ് ആണെന്നും സംഭവത്തില് കേന്ദ്രമന്ത്രി നരോട്ടം മിശ്ര പ്രതികരിച്ചു.
‘മോദി തെരഞ്ഞെടുപ്പുകള് അവസാനിപ്പിക്കും, മോദി മതത്തിന്റെയും ജാതിയുടെയും ഭാഷയുടെയും അടിസ്ഥാനത്തില് ആളുകളെ വേര്തിരിക്കും, ദളിതരുടെയും ആദിവാസികളുടെയും ന്യൂനപക്ഷങ്ങളുടെയും ജീവന് അപകടത്തിലാണ്. ഭരണഘടനയെ രക്ഷിക്കണമെങ്കില് മോദിയെ കൊല്ലാന് തയ്യാറാകണം,’ പാര്ട്ടി പ്രവര്ത്തകരുടെ യോഗത്തില് പതേറിയ ഇത്തരത്തിലൊരു ആഹ്വാനവുമായി പ്രസംഗിക്കുന്ന വീഡിയോ ആണ് പുറത്തായിരിക്കുന്നത്. അതേസമയം, പിന്നീട് ഇതേ വീഡിയോയില് വധിക്കല് എന്നത് കൊണ്ട് പരാജയപ്പെടുത്തുക എന്നാണ് താന് ഉദ്ദേശിക്കുന്നതെന്നും പതേറിയ പറയുന്നുണ്ട്. മഹാത്മാഗാന്ധിയുടെ അഹിംസ എന്ന ആദര്ശമാണ് താന് പിന്തുടരുന്നതെന്നും അതിനാല് ന്യൂനപക്ഷങ്ങളെ സംരക്ഷിക്കുന്നതിന് മോദിയെ തെരഞ്ഞെടുപ്പില് പരാജയപ്പെടുത്തേണ്ടത് അനിവാര്യമാണെന്നുമാണ് താന് ഉദ്ദേശിച്ചതെന്നും തന്റെ നാക്കുപിഴ തിരിച്ചറിഞ്ഞ് പതേറിയ തിരുത്തുന്നുണ്ട്.
പഞ്ഞ ജില്ലയിലെ പവായി നഗരത്തില് നിന്നാണ് വീഡിയോ പുറത്ത് വന്നിരിക്കുന്നത്. കോണ്ഗ്രസിന്റെ യഥാര്ത്ഥ വികാരമാണ് ഈ പ്രസ്താവന കാണിക്കുന്നതെന്നും പ്രധാനമന്ത്രി ജനഹൃദയങ്ങളിലാണ് ജീവിക്കുന്നതെന്നും ഈ രാജ്യത്തിന്റെയൊന്നാകെയുള്ള ആരാധനാകേന്ദ്രവും പ്രതീക്ഷയുമാണ് അദ്ദേഹമെന്നും ശിവരാജ് സിംഗ് ചൗന് പ്രതികരിച്ചു.
Discussion about this post