മലയാളി ഫുട്‌ബോള്‍ പ്രേമികളുടെ താരങ്ങളോടുള്ള ആരാധന കടല്‍ കടന്നിട്ടുണ്ട്, ഇപ്പോഴിതാ ഇഷ്ടതാരത്തെ കടലിനടിയില്‍ പവിഴപ്പുറ്റുകള്‍ക്കിടയില്‍ ഉയര്‍ത്തിയിരിക്കുകയാണ് മലയാളികള്‍. ലോകകപ്പ് ഫുട്‌ബോളിന്റെ ഫൈനലില്‍ അര്‍ജന്റീന പ്രവേശിച്ചാല്‍ മെസ്സിയുടെ കട്ടൗട്ട് കടലിനടിയില്‍ ഉയര്‍ത്തും എന്നായിരുന്നു കവരത്തിയില്‍ നിന്നുള്ള ആരാധകന്‍ പറഞ്ഞിരുന്നത്, ആ വാക്ക് ഇപ്പോള്‍ പാലിച്ചിരിക്കുകയാണ് മുഹമ്മദ് സ്വാദിഖ്.
‘ പറഞ്ഞ വാക്ക് പാലിച്ചിട്ടുണ്ട്. നമ്മടെ ചെക്കന്‍ പവിഴപ്പുറ്റുകള്‍ക്കും വര്‍ണ മത്സ്യങ്ങള്‍ക്കും ഇടയില്‍ നിന്നത് കണ്ടോ’ എന്ന ചെറു കുറിപ്പിനൊപ്പം കട്ടൗട്ട് ലക്ഷദ്വീപ് കടലില്‍ ഉയര്‍ത്തിയ വീഡിയോയാണ് സ്വാദിഖ് ഫേസ്ബുക്കില്‍ പങ്കുവെച്ചത്. അര്‍ജന്റീനയുടെ ആരാധകര്‍ സോഷ്യല്‍ മീഡിയയിലെങ്ങും വീഡിയോ നെഞ്ചിലേറ്റി ആഘോഷിക്കുകയാണിപ്പോള്‍ .
അറബിക്കടലില്‍ 15 മീറ്റര്‍ അടിയോളം താഴ്ചയിലാണ് കട്ടൗട്ട് സ്ഥാപിച്ചിരിക്കുന്നത്. പവിഴപ്പുറ്റുകള്‍ക്കിടയില്‍ പുഞ്ചിരി തൂകി നില്‍ക്കുന്ന മെസിയുടെ ചിത്രം സ്‌കൂബ ഡൈവിംഗ് സംഘത്തിന്റെ സഹായത്തോടെയാണ് സ്ഥാപിച്ചത്. കട്ടൗട്ട് ഉയര്‍ത്താന്‍ ബോട്ടില്‍ പോകുന്നതിന്റെ ചിത്രങ്ങളും സ്വാദിഖ് ഫേസ്ബുക്കില്‍ പങ്കുവെച്ചിരുന്നു.
Discussion about this post