തിരുവനന്തപുരം: വസ്ത്രധാരണത്തെച്ചൊല്ലിയുളള തർക്കത്തെ തുടർന്ന് ഭാര്യയെ നടുറോഡിൽ വെട്ടിക്കൊന്ന് ഭർത്താവ്. കന്യാകുമാരിക്ക് സമീപം തക്കലയിൽ ഇന്നലെ രാത്രിയാണ് സംഭവം.
തച്ചലോട് സ്വദേശിനിയായ ജെബ ബെർനിഷയാണ് മരിച്ചത്. മൂന്ന് മാസങ്ങളായി ഇവർ ബ്യൂട്ടീഷ്യൻ കോഴ്സ് പഠിക്കുന്നുണ്ട്. നെയ്യാറ്റിൻകരയിലെ സ്ഥാപനത്തിലായിരുന്നു പഠനം. ഇതിന് ശേഷം ജെബയുടെ വസ്ത്രധാരണ രീതിയെച്ചൊല്ലി ഭർത്താവ് എബനേസർ നിരന്തരം വഴക്കുണ്ടാക്കാറുണ്ടായിരുന്നു.
മോഡേൺ വസ്ത്രങ്ങൾ ധരിക്കാൻ തുടങ്ങിയതോടെയാണ് കലഹം തുടങ്ങിയത്. ഇത് സംബന്ധിച്ച് ഇന്നലെയും ഇരുവരും തമ്മിൽ തർക്കമുണ്ടായെങ്കിലും അച്ഛന്റെ മദ്ധ്യസ്ഥതയിൽ പരിഹരിച്ച് മടങ്ങും വഴി വീണ്ടും വഴക്കുണ്ടാകുകയായിരുന്നു.
കൈയ്യിൽ കരുതിയ കത്തി ഉപയോഗിച്ചാണ് എബനേസർ ജെബയെ വെട്ടിക്കൊലപ്പെടുത്തിയത്. ഇതിന് ശേഷം ഗുളിക കഴിച്ച് ജീവനൊടുക്കാൻ ശ്രമിച്ച എബനേസറിനെ ആശുപത്രിയിൽ പ്രവേശിപ്പിച്ചിരിക്കുകയാണ്.
Discussion about this post