മുംബൈ: രഞ്ജി ട്രോഫിയിൽ മികച്ച ഫോമിലായിരുന്നിട്ടും മുംബൈ ക്രിക്കറ്റ് താരം സർഫറാസ് ഖാനെ ഇന്ത്യൻ ടീമിൽ ഉൾപ്പെടുത്താത്തതിനെതിരെ മുൻ ഇന്ത്യൻ ക്രിക്കറ്റ് താരം സുനിൽ ഗവാസ്കർ രംഗത്ത്. മെലിഞ്ഞ ആളുകളെ മാത്രമാണു സിലക്ടർമാർക്കു വേണ്ടതെങ്കിൽ ക്രിക്കറ്റ് കളിക്കാൻ മോഡലുകളെ തിരഞ്ഞെടുക്കണമെന്ന് ഗവാസ്കർ പരിഹസിച്ചു.
”നിങ്ങൾക്ക് വടിവൊത്ത ശരീരമുള്ളവരെയും മെലിഞ്ഞവരെയും മാത്രം മതിയെങ്കിൽ ഏതെങ്കിലും ഫാഷൻ ഷോയ്ക്കു പോയി അവിടുത്തെ ഏതെങ്കിലും മോഡലുകളെ തിരഞ്ഞെടുത്താൽ മതി. അവരുടെ കയ്യിൽ ബാറ്റഖും പന്തും കൊടുത്ത് കളിക്കാൻ ആവശ്യപ്പെടാം. താരങ്ങളുടെ വലുപ്പമനുസരിച്ചല്ല കാര്യങ്ങൾ തീരുമാനിക്കേണ്ടത. അവരുടെ സ്കോറും നേടിയ വിക്കറ്റുകളും നോക്കൂ എന്നാണ് സുനിൽ ഗവാസ്കറിന്റെ വിമർശനം.
മുംബൈയ്ക്ക് വേണ്ടി ഡൽഹിക്കെതിരെ 155 പന്തിൽ 125 റൺസ് നേടി മികച്ച ഫോമിൽ തുടരുന്ന 25 കാരനായ താരത്തെ ഓസ്ട്രേലിയക്കെതിരായി നടക്കുന്ന ആദ്യ രണ്ട് ടെസ്റ്റുകളിലേക്കുള്ള ടീമിൽ ഇടം നൽകാത്തതിൽ മറ്റ് നിരവധി ക്രിക്കറ്റ് താരങ്ങളും വിമർശനം ഉയർത്തിയിരുന്നു.
