ന്യൂഡൽഹി: ഇന്നത്തെ ആഗോള സാഹചര്യത്തിൽ ലോകരാജ്യങ്ങൾ മുഴുവൻ ഇന്ത്യയുടെ ബജറ്റിനെ ഉറ്റുനോക്കുകയാണെന്ന് പ്രധാനമന്ത്രി നരേന്ദ്രമോദി. ബജറ്റ് സമ്മേളനത്തിന് മുന്നോടിയായി പാർലമെന്റിന് പുറത്ത് മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം. അസ്ഥിരമായ ആഗോള സാമ്പത്തിക സാഹചര്യത്തിലും രാജ്യത്തെ സാധാരണ പൗരൻമാരുടെ പ്രതീക്ഷയും ആഗ്രഹവും നിറവേറ്റുന്നതായിരിക്കും ബജറ്റ് എന്നും പ്രധാനമന്ത്രി പറഞ്ഞു.
അത്തരം പ്രതീക്ഷകൾ നിറവേറ്റാൻ ധനമന്ത്രി നിർമല സീതാരാമൻ എല്ലാ പരിശ്രമവും നടത്തുമെന്ന് താൻ ഉറച്ചുവിശ്വസിക്കുന്നതായും പ്രധാനമന്ത്രി കൂട്ടിച്ചേർത്തു. രാജ്യം ആദ്യം, പൗരൻമാർ ആദ്യം
എന്ന ചിന്തയിലാകും പാർലമെന്റിന്റെ ബജറ്റ് സമ്മേളനം മുന്നോട്ടുപോകുക. പ്രതിപക്ഷ നേതാക്കൾ അവരുടെ അഭിപ്രായങ്ങൾ പാർലമെന്റിൽ അവതരിപ്പിക്കുമെന്നാണ് തന്റെ പ്രതീക്ഷയെന്നും പ്രധാനമന്ത്രി പറഞ്ഞു.
രാഷ്ട്രപതിയായി ചുമതലയേറ്റ ദ്രൗപതി മുർമു ആദ്യമായിട്ടാണ് പാർലമെന്റിന്റെ സംയുക്ത സമ്മേളനത്തെ അഭിസംബോധന ചെയ്യുന്നതെന്ന് പ്രധാനമന്ത്രി ചൂണ്ടിക്കാട്ടി. നമ്മുടെ ഭരണഘടനയ്ക്കും വനിതകൾക്കും ഏറെ അഭിമാനം നൽകുന്നതാണിതെന്നും പ്രധാനമന്ത്രി പറഞ്ഞു. നമ്മുടെ ധനമന്ത്രിയും ഒരു വനിതയാണ്. ഇത്തരം സാഹചര്യം കൊണ്ടു തന്നെ ലോകം ഇന്ത്യയിലേക്ക് കണ്ണ് നട്ടിരിക്കുകയാണെന്നും പ്രധാനമന്ത്രി പറഞ്ഞു.
Discussion about this post