ശ്രീനഗർ: കശ്മീരി പണ്ഡിറ്റുകളുടെ ഭൂമി കൈയ്യേറി അനധികൃതമായി നിർമ്മാണ പ്രവർത്തനങ്ങൾ നടത്തിയ ശേഷം കേന്ദ്ര സർക്കാരിനും രാജ്യത്തിനുമെതിരെ തുടർച്ചയായി കലാപാഹ്വാനം നൽകുന്ന വിഘടനവാദി നേതാക്കൾക്ക് ശക്തമായ മുന്നറിയിപ്പുമായി ബിജെപി നേതാവ് അൽത്താഫ് താക്കൂർ. ബാബയുടെ ബുൾഡോസർ കശ്മീരിലും ഉരുളും എന്നായിരുന്നു താക്കൂറിന്റെ മുന്നറിയിപ്പ്.
പണ്ഡിറ്റുകളുടെ പുനരധിവാസവുമായി ബന്ധപ്പെട്ട് ജമ്മു കശ്മീരിൽ നിലവിൽ കൈയ്യേറ്റങ്ങൾ ഒഴിപ്പിക്കുന്ന നടപടികൾ പുരോഗമിക്കുകയാണ്. ഇതിനെതിരെ വർഗീയ കലാപം സൃഷ്ടിക്കാനുള്ള ശ്രമത്തിന്റെ ഭാഗമായി ജമ്മു കശ്മീർ കിസാൻ തെഹ്രീക് നേതാവ് സഹൂർ അഹമ്മദ് പ്രതിഷേധ റാലി സംഘടിപ്പിച്ചിരുന്നു. ഈ സാഹചര്യത്തിലായിരുന്നു ബിജെപി നേതാവിന്റെ പ്രതികരണം.
ബുൾഡോസറിന് മുഹമ്മദ് സർഗാറിന്റെയോ ഫറൂഖ് അബ്ദുള്ളയുടെയോ മുസാഫർ ഷായുടെയോ സഹൂർ അഹമ്മദിന്റെയോ കൈയ്യേറ്റങ്ങൾ തമ്മിൽ ഭേദമുണ്ടാകില്ല. സമൂഹത്തിൽ മാന്യത നടിക്കുന്ന ഭൂമി കൈയ്യേറ്റക്കാരെ പൊതുമദ്ധ്യത്തിൽ വലിച്ചു കീറുമെന്ന് ജമ്മു കശ്മീർ ലഫ്റ്റ്നന്റ് ഗവർണർ വ്യക്തമാക്കിയിട്ടുള്ളതാണെന്നും അൽത്താഫ് താക്കൂർ പറഞ്ഞു.
ഭൂമി കൈയ്യേറ്റക്കാർക്കെതിരെ ഉത്തർ പ്രദേശിൽ നടക്കുന്ന കുടിയൊഴിപ്പിക്കൽ നടപടിയുടെ പശ്ചാത്തലത്തിൽ ഉയർന്നു വന്ന പ്രയോഗമാണ് ‘ബാബയുടെ ബുൾഡോസർ‘ എന്നത്. ഉത്തർ പ്രദേശ് മുഖ്യമന്ത്രി യോഗി ആദിത്യനാഥ് നേതൃത്വം നൽകുന്ന ഈ നടപടികൾക്ക് വർഗീയ നിറം നൽകാൻ ശ്രമിച്ച കലാപകാരികളുടെയും ക്രിമിനലുകളുടെയും കൈയ്യേറ്റങ്ങളുടെ നേർക്കും ഒരു വിവേചനവും കൂടാതെ യോഗിയുടെ ബുൾഡോസർ കൈകൾ നീണ്ടിരുന്നു.
Discussion about this post