അബുദാബി: ജൂലൈ ഒന്നോടെ കുറഞ്ഞത് 50 തൊഴിലാളികള് ഉള്ള സ്വകാര്യ സ്ഥാപനങ്ങളില് മൂന്ന് ശതമാനം പേര് എമിറാറ്റികള് ആയിരിക്കണമെന്ന നിര്ദ്ദേശവുമായി യുഎഇ സര്ക്കാര്. വര്ഷാവസാനത്തോടെ എമിറാറ്റിവല്ക്കരണ നിരക്ക് 4 ശതമാനത്തിലേക്ക് എത്തിക്കാനാണ് സര്ക്കാര് പദ്ധതി. 2023ല് ഇത് 6 ശതമാനമായും 2025ല് 8 ശതമാനമായും 2026ഓടെ 10 ശതമാനമായും ഉയര്ത്തി പടിപടിയായി എമിറാറ്റിവല്ക്കരണ ലക്ഷ്യങ്ങള് കൈവരിക്കാനാണ് സര്ക്കാര് പദ്ധതിയിടുന്നത്.
ഓരോ ആറുമാസത്തിലും എമിറാറ്റി തൊഴിലാളികളുടെ എണ്ണത്തില് ഒരു ശതമാനത്തിന്റെ വര്ധന നടപ്പാക്കിയാലേ സര്ക്കാര് നിര്ദ്ദേശം പാലിക്കാന് സ്വകാര്യ കമ്പനികള്ക്ക് സാധിക്കൂ. വിദഗ്ധ തൊഴില്മേഖലയ്ക്കാണ് ഈ നിര്ദ്ദേശം ബാധകമാകുക. സ്വതന്ത്ര മേഖലയില് പ്രവര്ത്തിക്കുന്ന കമ്പനികള്ക്ക് നിര്ദ്ദേശത്തില് ഇളവുണ്ടെങ്കിലും ഇവരും ഈ പദ്ധതിയില് അംഗങ്ങളാകാനാണ് സര്ക്കാര് താല്പ്പര്യപ്പെടുന്നത്.
2022 അവസാനത്തോടെ സ്വകാര്യസ്ഥാപനങ്ങളിലെ എമിറാറ്റികളുടെ എണ്ണം 2 ശതമാനമാക്കാനായിരുന്നു സര്ക്കാര് കമ്പനികള്ക്ക് നിര്ദ്ദേശം നല്കിയിരുന്നത്. 2027ഓടെ സ്വകാര്യ സ്ഥാപനങ്ങളില് പത്ത് ശതമാനം എമിറാറ്റികള് ആകണം എന്ന ലക്ഷ്യത്തിന്റെ ഭാഗമായി ഓരോ വര്ഷവും 2 ശതമാനം എമിറാറ്റികളെ സ്ഥാപനങ്ങളില് നിയമിക്കണമെന്ന നിര്ദ്ദേശമാണ് കമ്പനികള്ക്ക് മുമ്പിലുള്ളത്.നിര്ദ്ദേശം പാലിക്കാത്ത കമ്പനികള്ക്കെതിരെ മറ്റ് നിയമ നടപടികളൊന്നും ഉണ്ടാകില്ലെന്നും എന്നാല് ഓരോ ആറുമാസവും പിഴ ഒടുക്കേണ്ടി വരുമെന്നും മാനവവിഭവശേഷി, എമിറാറ്റിവല്ക്കരണ മന്ത്രാലയം വ്യക്തമാക്കി. 2023 അവസാനത്തോടെ 4 ശതമാനം എമിറാറ്റി ഉദ്യോഗസ്ഥര് എന്ന ലക്ഷ്യത്തില് എത്താത്ത കമ്പനികള് നിയമിക്കാത്ത ഒരു എമിറാറ്റിക്ക് 84,00 ദിര്ഹം എന്ന കണക്കിലാണ് പിഴ അടയ്ക്കേണ്ടി വരിക. 2026ഓടെ ഇത് 120,000 ദിര്ഹമായി മാറും.
രാജ്യത്തിന്റെ സാമ്പത്തിക അഭിവൃദ്ധിക്ക് എമിറാറ്റിവല്ക്കരണം ഒഴിച്ചുകൂടാനാകാത്തതാണെന്നാണ് ഭരണാധികാരികള് കരുതുന്നത്.
Discussion about this post