ആന്ധ്രപ്രദേശിലെ തിരുപ്പതി ക്ഷേത്രം ഇന്ത്യയിലെ ഏറ്റവും പ്രശസ്തമായ ക്ഷേത്രങ്ങളിലൊന്നാണ്. ലോകത്തിലെ ഏറ്റവും സമ്പന്നമായ ക്ഷേത്രവും തിരുപ്പതിയാണ്. മാര്‍ച്ച് ഒന്നുമുതല്‍ ഇവിടെ ദര്‍ശന രീതികളില്‍ ചില മാറ്റങ്ങള്‍ നടപ്പിലാക്കുകയാണ്. ഭക്തര്‍ക്കായി മുഖം തിരിച്ചറിയുന്നതിനുള്ള സംവിധാനം ഏര്‍പ്പെടുത്താനാണ് ആലോചിക്കുന്നത്. ദര്‍ശനവുമായി ബന്ധപ്പെട്ട് നിലവിലെ സംവിധാനങ്ങളിലുള്ള പഴുതുകള്‍ അടയ്ക്കുക എന്ന ലക്ഷ്യത്തോടെയാണ് ഈ തീരുമാനം.
തിരുമല തിരുപ്പതി ദേവസ്ഥാനത്തിനാണ് (റ്റിറ്റിഡി) ക്ഷേത്രത്തിന്റെ ഭരണച്ചുമതല. ആയിരക്കണക്കിന് വരുന്ന ഭക്തര്‍ക്ക് കൂടുതല്‍ കാര്യക്ഷമമായ സേവനങ്ങള്‍ ഒരുക്കുകയെന്ന ലക്ഷ്യത്തോടെയാണ് മാറ്റങ്ങള്‍ നടപ്പിലാക്കുന്നതെന്ന് ഭരണസമിതി അറിയിച്ചു. മുഖം തിരിച്ചറിയുന്നതിനുള്ള സംവിധാനം പരീക്ഷണാടിസ്ഥാനത്തിലായിരിക്കും നടപ്പിലാക്കുക.
ഭക്തര്‍ ഒന്നിലധികം ടോക്കണുകള്‍ നേടുന്നത് തടയുക എന്ന ലക്ഷ്യത്തോടെയാണ് ഈ സാങ്കേതികവിദ്യ ഏര്‍പ്പെടുത്തുന്നത്. സര്‍വ്വ ദര്‍ശനം കോംപ്ലക്‌സിലും കോഷന്‍ ഡിപ്പോസിറ്റ് റീഫണ്ട് കൗണ്ടറുകളിലും ഒരാള്‍ ഒന്നിലധികം ടോക്കണുകള്‍ വാങ്ങിക്കുന്നത് തടയുക എന്ന ഉദ്ദേശ്യത്തിലാണ് ഈ മാറ്റങ്ങള്‍ വരുത്തുന്നതെന്ന് ക്ഷേത്ര വെബ്‌സൈറ്റില്‍ പ്രസിദ്ധീകരിച്ചിരിക്കുന്ന അറിയിപ്പില്‍ പറയുന്നു.
സര്‍വ്വ ദര്‍ശനം ടോക്കണുകള്‍, ലഡ്ഡു പ്രസാദ വിതരണം, ഭക്തര്‍ക്കുള്ള താമസം എന്നിവിയിലടക്കം തിരുപ്പതിയില്‍ ചില തിരിമറികള്‍ നടക്കുന്നുണ്ടെന്ന് ചില റിപ്പോര്‍ട്ടുകളുണ്ട്.
ആന്ധ്രപ്രദേശിലെ തിരുമല കുന്നുകളിലാണ് തിരുപ്പതി ക്ഷേത്രം സ്ഥിതി ചെയ്യുന്നത്. 1933ല്‍ ക്ഷേത്രം സ്ഥാപിതമായതിന് ശേഷം ആദ്യമായി കഴിഞ്ഞ വര്‍ഷം നവംബറില്‍ റ്റിറ്റിഡി ക്ഷേത്ര ആസ്തി വെളിപ്പെടുത്തിയിരുന്നു. 2.5 ലക്ഷം കോടി രൂപയുടെ ആസ്തി ക്ഷേത്രത്തിനുണ്ടെന്നാണ് അന്ന് ഭരണസമിതി വ്യക്തമാക്കിയത്.
Discussion about this post