ടിക്ടോകിലെ ട്രെന്ഡുകള് ജനങ്ങള് ഏറ്റെടുക്കുന്നത് പതിവാണ്. അതിപ്പോള് സൗന്ദര്യവുമായി ബന്ധപ്പെട്ടതാകട്ടെ, ഫിറ്റ്നസുമായി ബന്ധപ്പെട്ടതാകട്ടെ ലോകം മുഴുവന് ടിക്ടോക് ട്രെന്ഡുകള് വന്ഹിറ്റാകും. പക്ഷേ ചിലപ്പോഴൊക്കെ സോഷ്യല് മീഡിയ നമ്മള് ഒട്ടും പ്രതീക്ഷിക്കാത്ത, അല്ലെങ്കില് പേടിപ്പെടുത്തുന്ന ചിലതും കണ്മുന്നില് കൊണ്ടിടും. അവയില് ചിലതെല്ലാം ട്രെന്ഡിംഗ് ആകുകയും ചെയ്യും. അങ്ങനൊന്നാണ് അടുത്തിടെ ടിക്ടോക്കില് ട്രെന്ഡായ ‘ഡെത്ത് ഡൈവിംഗ്’. പേരില് തന്നെ അപകടം ഒളിഞ്ഞിരിക്കുന്നുണ്ടെങ്കിലും ഇതും പരീക്ഷിച്ച് നോക്കുന്നവര് ഏറെയാണ്.
സാധാരണ നീന്തലില് നിന്നും വ്യത്യസ്തമായി വളരെ ഉയരത്തില് നിന്ന് വെള്ളത്തിലേക്ക് എടുത്തുചാടി നീന്തുന്ന രീതിയാണിത്. ചിലപ്പോഴത് സ്വമ്മിംഗ് പൂളിലേക്കാകാം അല്ലെങ്കില് കടലിലേക്കാകാം. എന്തായാലും അത്യന്തം അപകടകരമായ ഈ ട്രെന്ഡ് നിരവധി പേരാണ് പിന്തുടരുന്നത്. അവര് യുട്യൂബിലൂടെയും ടിക്ടോക്കിലൂടെയും മറ്റ് സോഷ്യല് മീഡിയ പ്ലാറ്റ്ഫോമുകളിലൂടെയും തങ്ങളുടെ ഡെത്ത് ഡൈവിംഗ് അനുഭവം പങ്കുവെക്കുകയും ചെയ്യുന്നു.
https://www.tiktok.com/@asbjorg_n/video/7137258056014155013
കണ്ണെത്താ ഉയരത്തില് നിന്ന് ആളുകള് വെള്ളത്തിലേക്ക് പറന്നുവന്നു വീഴുന്ന വീഡിയോകള് ഒരേസമയം അമ്പരപ്പോടെയും ഭീതിയോടെയുമാണ് ആളുകള് കാണുന്നത്. യഥാര്ത്ഥത്തില് നോര്വേയില് നേരത്തേയുണ്ടായിരുന്ന ഒരു മത്സര ഇനമാണ് ഇപ്പോള് ഡെത്ത് ഡൈവിംഗ് എന്ന പേരില് ലോകശ്രദ്ധയാകര്ഷിക്കുന്നത്.
ഡോഡ്സിംഗ് എന്നാണ് നോര്വേയില് ഈ മത്സരത്തിന് പറയുന്ന പേര്. ഈ മത്സരങ്ങള് നിയന്ത്രിക്കാനും നടത്തിപ്പിനുമായി ഡോഡ്സിംഗ് ഫെഡറേഷനും ഇവിടെയുണ്ട്. ഈ കമ്മിറ്റിയാണ് മത്സരത്തിന്റെ മാര്ഗ്ഗനിര്ദ്ദേശങ്ങളും നിയമങ്ങളും ലോക റാങ്കിംഗുമെല്ലാം നിശ്ചയിക്കുന്നത്. 2008 മുതല് എല്ലാ വര്ഷവും ആഗസ്റ്റില് നോര്വേയില് ഡോഡ്സിംഗ് ലോക ചാമ്പന്ഷിപ്പ് നടക്കാറുണ്ട്. ഇതിന് വേണ്ടി മത്സരാര്ത്ഥികളെ പരിശീലിപ്പിക്കുന്നതിനുള്ള പരിശീലന കേന്ദ്രങ്ങളും കോച്ചിംഗ് സെന്ററുകളും നോര്വേയില് ഉണ്ട്.
ഇത് തീര്ത്തും അപകടകരമായ ഒരു മത്സരമാണെന്നതില് ഒരു തര്ക്കവുമില്ല. പക്ഷേ പ്രഫഷണല് നീന്തല് താരങ്ങളാണ് ഇതില് മിക്കപ്പോഴും പങ്കെടുക്കുന്നത് എന്നതിനാല് പേരിലെ മരണത്തെ ആരും ഗൗനിക്കാറില്ലെന്നതാണ് സത്യം. 1970കളിലാണ് നോര്വേയില് ഈ നീന്തല് രീതി ആരംഭിക്കുന്നത്. സത്യം പറഞ്ഞാല് പെണ്കുട്ടികളുടെ മതിപ്പ് നേടാന് ആണ്കുട്ടികള് വെറുതേ ആരംഭിച്ചൊരു നീന്തല്രീതിയാണ് പിന്നീട് ഡെത്ത് ഡൈവിംഗ് എന്ന പേരില് ഇന്ന് ആണ്കുട്ടികളും പെണ്കുട്ടികളും ഒരു കൈ നോക്കാമെന്ന് വിചാരിച്ച് നോക്കുന്ന ഒരു ട്രെന്ഡ് ആയി മാറിയത്.
Discussion about this post