കൊൽക്കത്ത: എഞ്ചിൻ ബ്ലേഡ് തകർന്നതായി പൈലറ്റിന്റെ ശ്രദ്ധയിൽപ്പെട്ടതിനെ തുടർന്ന് ബാങ്കോക്കിലേക്കുള്ള സ്പൈസ് ജെറ്റ് വിമാനം അടിയന്തരമായി താഴെയിറക്കി. തിങ്കളാഴ്ച പുലർച്ചെയാണ് കൊൽക്കത്തയിൽ നിന്ന് ബാങ്കോക്കിലേക്ക് വിമാനം പുറപ്പെട്ടത്. പുലർച്ചെ 1.27ന് വിമാനം അടിയന്തരമായി ഇറക്കി, യാത്രക്കാരെയും ജീവനക്കാരെയും സുരക്ഷിതരായി പുറത്തെത്തിച്ചു.
178 യാത്രക്കാരും 6 ജീവനക്കാരും ഉൾപ്പെടെയാണ് കൊൽക്കത്ത വിമാനത്താവളത്തിൽ നിന്ന് പുലർച്ചെ 1.09 ഓടെ ബാങ്കോക്കിലേക്ക് എസ്ജി 83 ബോയിംഗ് 737 വിമാനം പുറപ്പെട്ടത്. മിനിറ്റുകൾക്കുള്ളിൽ തന്നെ ഇടതു എൻജിന്റെ ബ്ലേഡ് തകർന്നതായി പൈലറ്റിന്റെ ശ്രദ്ധയിൽപ്പെട്ടു.
താമസിയാതെ, അദ്ദേഹം എയർ ട്രാഫിക് കൺട്രോളുമായി ബന്ധപ്പെട്ടു,1.27ന് വിമാനം അടിയന്തരമായി നിലത്തിറക്കി. കൊൽക്കത്ത വിമാനത്താവളത്തിൽ ഫയർ എഞ്ചിനുകൾ, ആംബുലൻസുകൾ, സിഐഎസ്എഫിന്റെ എമർജൻസി ടീമുകൾ എന്നിവ സജ്ജീകരിച്ചിരുന്നു. വിമാനത്താവളത്തിൽ സമ്പൂർണ ജാഗ്രതാ നിർദ്ദേശം നൽകുകയും ചെയ്തു.
യാത്രക്കാരെയും ജീവനക്കാരെയും സുരക്ഷിതരായി പുറത്തെത്തിച്ചതായി എയർപോർട്ട് അധികൃതർ അറിയിച്ചു. രാവിലെ 7.10ന് മറ്റൊരു വിമാനത്തിൽ യാത്രക്കാർ ബാങ്കോക്കിലേക്ക് പുറപ്പെട്ടതായി അധികൃതർ അറിയിച്ചു. എഞ്ചിൻ ബ്ലേഡ് തകരാറിലായ വിമാനം പരിശോധിച്ചു വരികയാണെന്നും അധികൃതർ പറഞ്ഞു.
Discussion about this post