അന്റാർട്ടിക്കിലെ മഞ്ഞുപാളികൾക്കിടയിൽ പെട്ടെന്ന് പ്രത്യക്ഷപ്പെടുന്ന അതിവിശാലമായ തുറന്ന ജലാശയമായ (Polynya) ‘മോഡ് റൈസ് പൊളിനിയ’യുടെ 250 വർഷത്തെ ചരിത്രം ചുരുളഴിച്ച് ഇന്ത്യൻ ശാസ്ത്രജ്ഞർ. അന്റാർട്ടിക്കയിലെ മഞ്ഞുമൂടിയ കടലിൽ കൂറ്റൻ ദ്വാരം പോലെ പ്രത്യക്ഷപ്പെടുന്ന ഈ പ്രതിഭാസത്തിന് പിന്നിലെ രഹസ്യങ്ങളാണ് അന്താരാഷ്ട്ര ഭൗമശാസ്ത്ര മാസികയായ ‘ദി ക്രയോസ്ഫിയറി’ൽ (The Cryosphere) പ്രസിദ്ധീകരിച്ച പുതിയ പഠനത്തിലൂടെ വ്യക്തമായിരിക്കുന്നത്.
ഭൂമിശാസ്ത്ര മന്ത്രാലയത്തിന് കീഴിലുള്ള ഗോവയിലെ നാഷണൽ സെന്റർ ഫോർ പോളാർ ആൻഡ് ഓഷ്യൻ റിസർച്ചിലെ (NCPOR) ശാസ്ത്രജ്ഞരുടെ നേതൃത്വത്തിലാണ് ഈ അപൂർവ്വ നേട്ടം കൈവരിച്ചത്. ഡെൻമാർക്ക്, നോർവേ എന്നിവിടങ്ങളിൽ നിന്നുള്ള ശാസ്ത്രജ്ഞരും ഈ പഠനത്തിൽ പങ്കാളികളായി. കിഴക്കൻ അന്റാർട്ടിക്കയിലെ ജുപ്രാനൻ ഐസ് റൈസിൽ (Djupranen Ice Rise) നിന്ന് തുളച്ചെടുത്ത 122 മീറ്റർ നീളമുള്ള മഞ്ഞുപാളി (Ice Core) ഗോവയിലെ എൻസിപിഒആർ ലാബിൽ എത്തിച്ച് വിശകലനം ചെയ്താണ് ഇവർ ചരിത്രം പുനഃസൃഷ്ടിച്ചത്. മഞ്ഞുപാളികളിൽ നൂറ്റാണ്ടുകളായി അടിഞ്ഞുകൂടിയ രാസഘടകങ്ങളും അന്തരീക്ഷ മാറ്റങ്ങളും പരിശോധിച്ചതിലൂടെ 1774 വരെയുള്ള കടൽ മഞ്ഞിന്റെ ചരിത്രം ശാസ്ത്രജ്ഞർക്ക് കണ്ടെത്താനായി.
അന്റാർട്ടിക്കയിലെ വെഡൽ കടലിൽ (Weddell Sea) സ്ഥിതി ചെയ്യുന്ന ഈ പ്രദേശം അന്തരീക്ഷവും സമുദ്രവും തമ്മിലുള്ള ചൂട് കൈമാറ്റത്തിൽ വലിയ മാറ്റങ്ങളാണ് വരുത്തുന്നത്. പരിശോധിച്ച 250 വർഷത്തിനിടയിൽ 25 തവണയെങ്കിലും ഇത്തരത്തിൽ മഞ്ഞുപാളികൾ മാറി വലിയ തോതിൽ കടൽ തെളിഞ്ഞുവന്നതായി കണ്ടെത്തി. ഇതിൽ 1974-76 കാലഘട്ടത്തിലുണ്ടായ കൂറ്റൻ പ്രതിഭാസത്തിന് സമാനമായ മൂന്ന് വലിയ സംഭവങ്ങളും ഉണ്ടായിട്ടുണ്ട്. 1974-76ൽ മൂന്ന് ലക്ഷം ചതുരശ്ര കിലോമീറ്ററിലധികം വിസ്തൃതിയിലാണ് ഈ ഭാഗത്ത് മഞ്ഞ് ഉരുകി കടൽ പ്രത്യക്ഷപ്പെട്ടത്. പിന്നീട് 2016-17 കാലയളവിൽ 40,000 ചതുരശ്ര കിലോമീറ്ററിലധികം വിസ്തൃതിയിലും ഇത് ആവർത്തിച്ചു.
കടലിന്റെ ആഴങ്ങളിലെ ചൂടുകൂടിയ വെള്ളം അന്റാർട്ടിക്കിലെ തണുത്തുറഞ്ഞ അന്തരീക്ഷത്തിലേക്ക് നേരിട്ടെത്താൻ ഈ പ്രതിഭാസം കാരണമാകുന്നു. ഇത് സമുദ്ര പ്രവാഹങ്ങളെയും അന്റാർട്ടിക്കയിലെ കാലാവസ്ഥയെയും വലിയ രീതിയിൽ സ്വാധീനിക്കും. വരുംകാലങ്ങളിൽ ആഗോള കാലാവസ്ഥാ വ്യതിയാനത്തെക്കുറിച്ചും ധ്രുവപ്രദേശങ്ങളിലെ മാറ്റങ്ങളെക്കുറിച്ചും കൃത്യമായി മനസ്സിലാക്കാൻ ഇന്ത്യൻ ശാസ്ത്രജ്ഞരുടെ ഈ കണ്ടെത്തൽ നിർണ്ണായകമാകും.
