ഹിരോഷിമ സര്‍വ്വകലാശാല, പ്രസിഡന്‍സി സര്‍വ്വകലാശാല, ദേശീയ ഭൂമിശാസ്ത്ര പഠന കേന്ദ്രം എന്നിവര്‍ ചേര്‍ന്ന് കഴിഞ്ഞിടെ ഹൈദരാബാദില്‍ നിന്നും 100 കിലോമീറ്റര്‍ ദൂരത്തിലുള്ള ചിത്രയിലില്‍ നിന്ന് കുറച്ച് ശിലാപാളികള്‍ കണ്ടെത്തി. സാധാരണ പാറക്കഷ്ണങ്ങള്‍ അല്ല. 4.1 ശതകോടി വര്‍ഷം പഴക്കമുള്ള സിര്‍കോണ്‍ എന്ന ധാതുവിന്റെ അംശമുള്ള ശിലകള്‍.
മറ്റൊരു രീതിയില്‍ പറഞ്ഞാല്‍ ഈ കണ്ടെത്തലിന്റെ പ്രാധാന്യം ഒന്നുകൂടി വ്യക്തമാകും. ദ്രവാവസ്ഥയിലുള്ള മാഗ്മയില്‍ നിന്നും ഭൂവല്‍ക്കം എന്നറിയപ്പെടുന്ന ക്രസ്റ്റ് രൂപം കൊണ്ടപ്പോള്‍ ഖരാവസ്ഥയിലേക്ക് രൂപാന്തരപ്പെട്ട ആദ്യ ധാതുക്കളില്‍ ഒന്ന് സിര്‍ക്കോണ്‍ ആണെന്നാണ് പറയപ്പെടുന്നത്. അതായത് ഇപ്പോള്‍ ഹൈദരാബാദില്‍ നിന്നും കണ്ടെത്തിയ പാറക്കഷ്ണങ്ങളിലെ സിര്‍കോണ്‍ ഒരുപക്ഷേ ഭൂമിയുടെ ഉത്ഭവകാലത്ത് ഉള്ളതായിരിക്കാം, അല്ലെങ്കില്‍ ഭൂമിയുടെ ഉത്ഭവത്തെ കുറിച്ച് എന്തെങ്കിലും സൂചനകള്‍ നല്‍കാന്‍ കെല്‍പ്പുള്ളതായിരിക്കാം. രസതന്ത്രപരമായി സ്ഥിരതയുള്ള, കാഠിന്യമുള്ള സിര്‍കോണ്‍, ഈ സവിശേഷതകള്‍ കൊണ്ടുതന്നെ പൊടിഞ്ഞുപോകാനുള്ള സാധ്യത വിരളമാണ്. അതിനാല്‍ 4.1 ശതകോടി വര്‍ഷം പഴക്കമുള്ള, ഹൈദരാബാദില്‍ നിന്ന് കണ്ടെത്തിയ സിര്‍കോണിന് അന്ന് തൊട്ടുള്ള ഭൂമിശാസ്ത്രപരമായ നിര്‍ണായക സംഭവവികാസങ്ങളെ കുറിച്ച് സൂചനകള്‍ നല്‍കാന്‍ സാധിച്ചേക്കുമെന്ന് വിദഗ്ധര്‍ കരുതുന്നു.
ഭൂമിയുടെ ചരിത്രത്തിലെ പരമപ്രധാനവും, നിഗൂഢവുമായ ആദ്യ അമ്പതുകോടി വര്‍ഷങ്ങളില്‍ നടന്ന കാര്യങ്ങളെ കുറിച്ച് സൂചന നല്‍കാന്‍ ഈ കണ്ടെത്തലിന് സാധിക്കുമെന്നാണ് ജിയോളജിസ്റ്റുകള്‍ കരുതുന്നത്. ഈ കണ്ടെത്തലുമായി ബന്ധപ്പെട്ട ഗവേഷണം പ്രീകാമ്പ്രിയന്‍ റിസര്‍ച്ച് ജേണലില്‍ പ്രസിദ്ധീകരിച്ചിട്ടുണ്ട്.
ഇന്ത്യയിലെ ശിലകളില്‍ ഭൂമിയുടെ ആദ്യകാല ചരിത്രവുമായി ബന്ധപ്പെട്ട തെളിവുകള്‍ ഒളിഞ്ഞുകിടക്കുന്നു എന്നതാണ് ചിത്രയിലിലെ ഈ കണ്ടെത്തല്‍ സൂചിപ്പിക്കുന്നതെന്ന് ഗവേഷണത്തിന്റെ ഭാഗമായ മുതിര്‍ന്ന ജിയോളജിസ്റ്റും പ്രസിഡന്‍സി സര്ഡവ്വകലാശാലയിലെ ജിയോളജി പ്രഫസറും നാച്ചുറല്‍ ആന്‍ഡ് മാത്തമാറ്റിക്കല്‍ സയന്‍സ് ഡീനുമായ ശങ്കര്‍ ബോസ് വ്യക്തമാക്കുന്നു. വളരെ നിര്‍ണായകമായ കണ്ടെത്തലാണിതെന്നും ഇപ്പോള്‍ ലഭിച്ച ശിലഭാഗങ്ങളുടെ തുടര്‍പഠനത്തില്‍ നിന്നും ഭൂമി രൂപപ്പെട്ട് ദശലക്ഷം വര്‍ഷങ്ങള്‍ പിന്നിട്ടപ്പോഴുള്ള രാസ, ഭൗതിക അവസ്ഥകളും വെള്ളത്തിന്റേതുള്‍പ്പടെയുള്ള സാന്നിധ്യവും അറിയാന്‍ കഴിഞ്ഞേക്കുമെന്നും അദ്ദേഹം പറയുന്നു.
അതേസമയം ഇതാദ്യമായല്ല ഇന്ത്യയില്‍ നിന്നും പ്രാചീന ധാതുക്കളുടെ സാന്നിധ്യമുള്ള ശിലാപാളികള്‍ കണ്ടെത്തുന്നത്. 2018ല്‍ ഒഡിഷയിലെ കേന്ദുജര്‍ ജില്ലയില്‍ നിന്നും ലഭിച്ച ടോണലൈറ്റ് ശിലയ്ക്ക് 4.2 ശതകോടി വര്‍ഷം പഴക്കമുണ്ടെന്നാണ് കരുതപ്പെടുന്നത്. 2016ല്‍ വയനാട്ടില്‍ നിന്നും 4 ശതകോടി വര്‍ഷം പഴക്കമുള്ള സിര്‍കോണ്‍ കണ്ടെത്തിയിരുന്നു. അതേസമയം ഭൂമിയില്‍ തന്നെ ഏറ്റവും പഴക്കമേറിയ സിര്‍കോണ്‍ കണ്ടെത്തിയിട്ടുള്ളത് പടിഞ്ഞാറന്‍ ഓസ്‌ട്രേലിയയിലെ ജാക്ക് ഹില്ലില്‍ നിന്നുമാണ്. അതിന് ഏതാണ്ട് 4.4 ശതകോടി വര്‍ഷം പഴക്കമുണ്ടായിരുന്നു.
Discussion about this post