തിരുവനന്തപുരം : സംസ്ഥാനത്ത് കാലവർഷം വീണ്ടും കനത്തതോടെ പരക്കെ അതിശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. നേരത്തെ ചില ജില്ലകളിൽ മാത്രം പ്രവചിച്ചിരുന്ന മഴ മുന്നറിയിപ്പ് പിന്നീട് പുതുക്കിയതോടെ സംസ്ഥാനത്തെ മുഴുവൻ ജില്ലകളിലും ഇപ്പോൾ യെല്ലോ അലർട്ട് പ്രഖ്യാപിച്ചിരിക്കുകയാണ്. അടുത്ത അഞ്ച് ദിവസങ്ങളിൽ കേരളത്തിൽ വ്യാപകമായ മഴ തുടരുമെന്നാണ് കാലാവസ്ഥാ നിരീക്ഷണ കേന്ദ്രം വ്യക്തമാക്കുന്നത്. ഒപ്പം മണിക്കൂറിൽ 50 കിലോമീറ്റർ വരെ വേഗതയിൽ വീശിയടിക്കാവുന്ന ശക്തമായ കാറ്റിനും ഇടിമിന്നലിനും സാധ്യതയുള്ളതിനാൽ പൊതുജനങ്ങൾ അതീവ ജാഗ്രത പാലിക്കണമെന്ന് ദുരന്തനിവാരണ അതോറിറ്റി നിർദ്ദേശിച്ചു.
അറബിക്കടലിൽ രൂപപ്പെട്ട ചക്രവാതച്ചുഴിയും പുതിയ ന്യൂനമർദ സാന്നിധ്യവുമാണ് നിലവിൽ വടക്കൻ-മധ്യ കേരളത്തിൽ മഴ ഇത്രത്തോളം കനക്കാൻ കാരണം. തുടർച്ചയായ മഴയെത്തുടർന്ന് തൃശൂർ ജില്ലയിലെ ഇരിങ്ങാലക്കുടയിൽ മിന്നൽ ചുഴലി അനുഭവപ്പെടുകയും നിരവധി മരങ്ങൾ കടപുഴകി വീണ് വീടുകൾക്ക് നാശനഷ്ടമുണ്ടാകുകയും ചെയ്തിട്ടുണ്ട്. വരും ദിവസങ്ങളിൽ മഴയുടെ ശക്തി വടക്കൻ കേരളത്തിലേക്ക് കൂടുതൽ കേന്ദ്രീകരിക്കുമെന്നാണ് പ്രവചനം. ഇതിന്റെ ഭാഗമായി തിങ്കൾ, ചൊവ്വ ദിവസങ്ങളിൽ കണ്ണൂർ, കാസർഗോഡ്, കോഴിക്കോട് ജില്ലകളിൽ അതിശക്തമായ മഴ പ്രവചിച്ചുകൊണ്ട് ഓറഞ്ച് അലർട്ടും പുറപ്പെടുവിച്ചിട്ടുണ്ട്.
കനത്ത മഴ പെയ്യുന്ന സാഹചര്യത്തിൽ മലയോര മേഖലകളിലും നദിക്കരകളിലും താമസിക്കുന്നവർ മലവെള്ളപ്പാച്ചിലിനും മണ്ണിടിച്ചിലിനും സാധ്യതയുള്ളതിനാൽ പ്രത്യേക മുൻകരുതലുകൾ സ്വീകരിക്കണമെന്ന് മുന്നറിയിപ്പുണ്ട്. കടൽ അതീവ ക്ഷുഭിതമാകാൻ സാധ്യതയുള്ളതിനാൽ കേരള തീരത്തുനിന്നുള്ള മത്സ്യബന്ധനത്തിനുള്ള വിലക്കും തുടരും. അടിയന്തര സാഹചര്യങ്ങളിൽ സഹായത്തിനായി താലൂക്ക്, ജില്ലാ കൺട്രോൾ റൂമുകളുമായി 1077, 1070 എന്നീ ടോൾ ഫ്രീ നമ്പറുകളിൽ ബന്ധപ്പെടാനും ദുരന്തനിവാരണ അതോറിറ്റി അറിയിച്ചു.
