ന്യൂഡല്‍ഹി: നരേന്ദ്രമോദിയുടെ നേതൃത്വത്തിലുള്ള എന്‍ഡിഎ സര്‍ക്കാര്‍ അധികാരത്തില്‍ വന്നതിന് ശേഷം ഇന്ത്യയുടെ വാര്‍ഷിക ആളോഹരി വരുമാനം ഇരട്ടിയായതായി ദേശീയ സ്ഥിതിവിവര കണക്ക് ഓഫീസ് (എന്‍എസ്ഒ). 2014-15ലെ 86,647 രൂപയില്‍ നിന്നും വാര്‍ഷിക ആളോഹരി വരുമാനം 2022-23ല്‍ 1,72,000 ആയി ഉയര്‍ന്നു. അതായത് 99 ശതമാനത്തിന്റെ വളര്‍ച്ച.
കോവിഡ് കാലത്ത് ഇന്ത്യയുടെ ആളോഹരി വരുമാനത്തില്‍ ഇടിവുണ്ടായെങ്കിലും 2021-22, 2022-23 കാല സാമ്പത്തിക വര്‍ഷത്തില്‍ സ്ഥിതി മെച്ചപ്പെട്ടതായി എന്‍എസ്ഒ ഡാറ്റ വ്യക്തമാക്കുന്നു.
ലോക വികസന സൂചികയുമായി ബന്ധപ്പെട്ട ഡാറ്റബേസില്‍ 2014 മുതലുള്ള കാലയളവില്‍ ഇന്ത്യയുടെ ആളോഹരി വരുമാനത്തിലുള്ള ശരാശരി വളര്‍ച്ച പ്രതിവര്‍ഷം 5.6 ശതമാനമാനമാണെന്ന് മുന്‍നിര സാമ്പത്തിക ഗവേഷണ സ്ഥാപനമായ എന്‍ഐപിഎഫ്എപിയുടെ ഡയറക്ടറായ പിനാകി ചൗധരി വ്യക്തമാക്കി. ഈ വളര്‍ച്ച വളരെ വലുതാണ്. ആരോഗ്യം, വിദ്യാഭ്യാസം, സാമ്പത്തികം, ഗതാഗതം എന്നീ മേഖലകളെല്ലാം മെച്ചപ്പെട്ടു. കോവിഡ് വളരെ മോശമായി സമ്പദ് വ്യവസ്ഥയെ ബാധിച്ചെങ്കിലും അതിനുശേഷം ഇന്ത്യന്‍ സാമ്പത്തിക രംഗം തിരിച്ചുകയറിയെന്നാണ് മനസിലാക്കേണ്ടതെന്ന് അദ്ദേഹം കൂട്ടിച്ചേര്‍ത്തു.
ആളോഹരി വരുമാനത്തിലെ 5-6 ശതമാനത്തിന്റെ വാര്‍ഷിക വളര്‍ച്ച നിലനിര്‍ത്താനാകുകയും അതിനൊപ്പം സാമ്പത്തിക മേഖലയെ ശക്തിപ്പെടുത്തുന്നതിനുള്ള നയങ്ങള്‍ ഉണ്ടാകുകയും ചെയ്താല്‍ ഈ വളര്‍ച്ച നിലനിര്‍ത്താനാകുമെന്ന് പിനാകി ചൗധരി അഭിപ്രായപ്പെട്ടു.
അതേസമയം വരുമാനത്തിനുള്ള അസമത്വം ഇന്ത്യയ്ക്ക് ഇപ്പോഴും വെല്ലുവിളിയായി തുടരുകയാണ്. ആളോഹരി വരുമാനത്തിലെ വളര്‍ച്ച രാജ്യത്തെ പത്ത് ശതമാനം ജനതയ്ക്ക് മാത്രമേ നേട്ടമാകുന്നുള്ളു. വരുമാന അസമത്വത്തിനൊപ്പം പണപ്പെരുപ്പവും ഇന്ത്യയ്ക്ക് വെല്ലുവിളിയാണ്. എന്നാല്‍ ഈ എല്ലാ വെല്ലുവിളികള്‍ക്കിടയിലും ലോകത്തിലെ അതിവേഗം വളര്‍ന്നുകൊണ്ടിരിക്കുന്ന പ്രധാന സമ്പദ് വ്യവസ്ഥകളിലൊന്നായി ഇന്ത്യ തുടരുകയാണ്. അന്താരാഷ്ട്ര നാണ്യനിധിയുടെ കണക്കനുസരിച്ച് യുകെയെ പിന്തള്ളി യുഎസ്, ചൈന, ജപ്പാന്‍, ജര്‍മ്മനി എന്നീ രാജ്യങ്ങള്‍ക്ക് പിന്നിലായി ലോകത്തിലെ അഞ്ചാമത്തെ വലിയ സാമ്പത്തിക ശക്തിയാണ് നിലവില്‍ ഇന്ത്യ. പത്തുവര്‍ഷം ലോക സാമ്പത്തിക ശക്തികളുടെ കൂട്ടത്തില്‍ പതിനൊന്നാം സ്ഥാനത്തുണ്ടായിരുന്ന ഇന്ത്യയാണ് അന്ന് അഞ്ചാം സ്ഥാനത്തുണ്ടായിരുന്ന യുകെയെ പിന്തള്ളി ആദ്യ അഞ്ച് സ്ഥാനങ്ങളില്‍ ഇടം നേടിയിരിക്കുന്നത്.
