കോയമ്പത്തൂർ : കോയമ്പത്തൂരിലെ ക്ഷേത്രത്തിനു മുന്നിലുണ്ടായ ബോംബ് സ്ഫോടനത്തിന്റെ ഉത്തരവാദിത്വം ഏറ്റെടുത്തതിന് പിന്നാലെ ഇന്ത്യയിൽ രക്തമൊഴുക്കുമെന്ന ഭീഷണിയുമായി ഐ എസ് ഖൊറാസൻ . കർണാടകയിലെ മംഗളൂരുവിലും സമാനമായ ബോംബ് സ്ഫോടനം നടന്നിരുന്നു. അതിന്റെ ഉത്തരവാദിത്വവും ഇതേ ഭീകര സംഘടന ഏറ്റെടുത്തിട്ടുണ്ട്.
ഐഎസ്കെപിയുടെ ‘അൽ-അസീം മീഡിയ ഫൗണ്ടേഷന്റെ’ 68 പേജുള്ള മുഖപത്രമാണ് ഇന്ത്യയിൽ രക്തം ചിന്തുമെന്ന് ഭീഷണിയുയർത്തിയിരിക്കുന്നത്. ഈ ബോംബ് ആക്രമണങ്ങളിലൂടെ ‘നമ്മുടെ സഹോദരങ്ങൾ പ്രതികാരം ചെയ്തു’ എന്നാണ് ഇതിൽ കുറിച്ചിരിക്കുന്നത്. ഫെബ്രുവരിയിൽ ഈ കേസിൽ ദക്ഷിണേന്ത്യയിലെ 40 സ്ഥലങ്ങളിൽ എൻഐഎ റെയ്ഡ് നടത്തിയിരുന്നു. രണ്ട് സ്ഫോടനങ്ങളുടേയും പൊതുവായ ബന്ധം സംബന്ധിച്ച് അന്വേഷണം പുരോഗമിക്കുകയാണ്.
2022 ഒക്ടോബർ 23 ന് നടന്ന ഈ സംഭവവുമായി ബന്ധപ്പെട്ട് എൻഐഎ നിരവധി പേരെ അറസ്റ്റ് ചെയ്തിട്ടുണ്ട്. മംഗളൂരുവിൽ ഓട്ടോറിക്ഷയിൽ സ്ഫോടനം ഉണ്ടായപ്പോൾ കോയമ്പത്തൂരിലെ കോട്ടൈ ഈശ്വരൻ ക്ഷേത്രത്തിന് മുന്നിൽ കാറിൽ സ്ഫോടനമുണ്ടായി. ആക്രമണത്തിൽ ജമേഷ മുബീൻ എന്ന ഭീകരനും കൊല്ലപ്പെട്ടു. ശ്രീലങ്കയിലെ ബോംബ് സ്ഫോടനങ്ങളുമായും ഇതിന് ബന്ധമുണ്ടെന്നാണ് സൂചന. ഇതിന് പിന്നാലെയാണ് തമിഴ്നാട്ടിലെ ഡിഎംകെ സർക്കാരിനെതിരെ ബിജെപി രംഗത്തെത്തിയിരിക്കുന്നത്.
‘ഇസ്ലാമിക് സ്റ്റേറ്റ് ഖൊറാസാൻ പ്രവിശ്യ’. ഇപ്പോൾ ഇന്ത്യയിലും ഭീഷണിയായിട്ടുണ്ട്. ഡിഎംകെക്കാർ ഇനിയെങ്കിലും ഉറക്കത്തിൽ നിന്ന് ഉണർന്ന് സിലിണ്ടർ സ്ഫോടന സിദ്ധാന്തം അവസാനിപ്പിക്കുമെന്ന് പ്രതീക്ഷിക്കുന്നു. ഇത് ഹിന്ദുക്കൾക്കെതിരായ ജിഹാദി ആക്രമണമാണെന്ന് എല്ലാവർക്കും വ്യക്തമായെന്നും ബിജെപി സംസ്ഥാന പ്രസിഡന്റ് അണ്ണാമലൈ പറഞ്ഞു.
