ബംഗളൂരു: ചെരിപ്പിനുള്ളിൽ ഒളിപ്പിച്ച് കടത്താൻ ശ്രമിച്ച സ്വർണവുമായി യാത്രക്കാരൻ പിടിയിൽ. 1.2 കിലോ സ്വർണമാണ് ബംഗളൂരു വിമാനത്താവളത്തിൽ വച്ച് യാത്രക്കാരനിൽ നിന്ന് പിടികൂടിയത്. അന്താരാഷ്ട്ര വിപിണിയിൽ 69.40 ലക്ഷം രൂപ വരുന്ന സ്വർണമാണ് പിടികൂടിയത്.
ബാങ്കോക്കിൽ നിന്ന് ഇൻഡിഗോ വിമാനത്തിലായിരുന്നു യാത്രക്കാരൻ ബംഗളൂരുവിലെത്തിയത്. സ്ലിപ്പറിനുള്ളിൽ നാല് കഷ്ണങ്ങളാക്കി ഒളിപ്പിച്ച നിലയിലായിരുന്നു സ്വർണം.
സ്വർണം കടത്തുന്നുവെന്ന രഹസ്യവിവരത്തിന്റെ അടിസ്ഥാനത്തിൽ വിമാനത്താവളത്തിൽ പരിശോധന കർശനമാക്കിയിരുന്നു. ഇതേ തുടർന്ന് സംശയം തോന്നിയ യാത്രക്കാരനെ ചോദ്യം ചെയ്തപ്പോൾ ചികിത്സാർത്ഥം ബാങ്കോക്ക് സന്ദർശിച്ചതാണെന്ന് പറഞ്ഞു. മെഡിക്കൽ രേഖകൾ നൽകാൻ ആവശ്യപ്പെട്ടപ്പോൾ അതില്ലെന്നായിരുന്നു മറുപടി. ഇതോടെ നടത്തിയ ദേഹപരിശോധനയിലാണ് സ്വർണം കണ്ടെത്തിയത്.
