പാലക്കാട് : താൻ മുഖ്യമന്ത്രിയുടെ മരുമകൻ ആണ് എന്നത് യാഥാർത്ഥ്യമാണെന്ന് മന്ത്രി മുഹമ്മദ് റിയാസ്. ആ വിളിയിൽ യാതൊരു പ്രശ്‌നവുമില്ലെന്നാണ് റിയാസ് പറയുന്നത്. ആരോപണങ്ങൾ ഉയരുമ്പോൾ പേടിച്ച് വീട്ടിൽ ഇരിക്കാറില്ലെന്നും അത്തരം വിമർശനങ്ങളെ കാര്യമാക്കില്ലെന്നും മന്ത്രി പറഞ്ഞു. വിമർശനം ഉന്നയിക്കുന്നവർക്ക് ചായയോ ബിരിയാണിയോ വാങ്ങി കൊടുക്കാനാണ് തോന്നാറുള്ളത് എന്നും മുഹമ്മദ് റിയാസ് പറഞ്ഞു.
എൽഡിഎഫ് സർക്കാർ വിരുദ്ധത ബിജെപി സംസ്ഥാന ഘടകം നടപ്പാക്കുന്നതിനേക്കാൾ ഭംഗിയായാണ് കേരളത്തിലെ ചില കോൺഗ്രസ് നേതാക്കന്മാർ നടപ്പിലാക്കുന്നത്. പ്രതിപക്ഷ നേതാവ് കേന്ദ്ര സർക്കാരിനെതിരെ ഒന്നും സംസാരിക്കുന്നില്ല. കേരള സർക്കാറിനെ അട്ടിമറിക്കാനാണ് പ്രതിപക്ഷ ശ്രമമെന്ന് പറഞ്ഞ റിയാസ്, സഭ നല്ല രീതിയിൽ നടക്കാൻ പ്രതിപക്ഷത്തിന് ഒരു താൽപ്പര്യവുമില്ലെന്നും കൂട്ടിച്ചേർത്തു.
ആർഎസ്എസ് ഏജന്റുമാരായി കോൺഗ്രസിലെ ചില നേതാക്കന്മാർ പ്രവർത്തിക്കുന്നുണ്ടോ എന്നത് കോൺഗ്രസ് പരിശോധിക്കണം. രാഷ്ട്രീയം പറയുമ്പോൾ രാഷ്ട്രീയത്തെ നേരിടാനുള്ള മാന്യത കോൺഗ്രസ് കാണിക്കണമെന്നും മറ്റു നീക്കങ്ങൾ നടത്തിയാലൊന്നും ഒരടി പിന്നോട്ട് പോകുന്നവരല്ലെന്നും റിയാസ് പറഞ്ഞു.
Discussion about this post