ഹിന്ദു യൂണിവേഴ്‌സിറ്റിയ്ക്ക് ഒരു ദശലക്ഷം ഡോളർ സംഭാവന നൽകി വ്യവസായി; യുവാക്കൾക്ക് ശരിയായ ജീവിതദിശ ലഭിക്കുമെന്ന് വ്യവസായി

വാഷിംഗ്ടൺ: ഹിന്ദു യൂണിവേഴ്‌സിറ്റി ഓഫ് അമേരിക്കയ്ക്ക് ഒരു ദശലക്ഷം ഡോളർ സംഭാവന നൽകി ഇന്ത്യൻ-അമേരിക്കൻ വ്യവസായി. ഹിന്ദു തത്ത്വചിന്തയിൽ അധിഷ്ഠിതമായ വിദ്യാഭ്യാസം നൽകുന്ന യുഎസിലെ ഏക സ്ഥാപനമാണ് ഫ്‌ളോറിഡ ആസ്ഥാനമായുള്ള ഹിന്ദു യൂണിവേഴ്‌സിറ്റി ഓഫ് അമേരിക്ക. ഇവിടുത്തേക്കാണ് രമേഷ് ഭൂതാഡ സംഭാവന നൽകിയത്.ഹൂസ്റ്റൺ ആസ്ഥാനമായുള്ള സ്റ്റാർ പൈപ്പ് പ്രൊഡക്ട്സിന്റെ സിഇഒയാണ് രമേഷ് ഭൂതാഡ.

1989ൽ സ്ഥാപിതമായതും 1993-ൽ ഫ്േളാറിഡ സ്റ്റേറ്റ് ഗവൺമെന്റിന്റെ അംഗീകാരമുള്ളതുമായ ഹിന്ദു യൂണിവേഴ്‌സിറ്റി ഓഫ് അമേരിക്കയ്ക്ക് ലഭിച്ച ഏറ്റവും ഉയർന്ന സംഭാവനയാണിത്.

യൂണിവേഴ്‌സിറ്റിയിലെ പഠനത്തിലൂടെ യുവാക്കൾക്ക് ജീവിതത്തിൽ വളരെ നേരത്തെ തന്നെ ഹിന്ദുമതത്തെക്കുറിച്ചുള്ള അറിവും ധാരണയും നേടാനാകും, സന്തോഷകരവും ഉൽപ്പാദനക്ഷമവുമായ ജീവിതം നയിക്കാൻ അവർ പ്രാപ്തരാകുമെന്ന് രമേഷ് ഭൂതാഡ പറഞ്ഞു.

ഒരു പരമ്പരാഗത ഹിന്ദു കുടുംബത്തിൽ ജനിച്ച് വളർന്നിട്ടും നിരവധി പ്രമുഖ ഹിന്ദു സംഘടനകളിലും പാരമ്പര്യങ്ങളിലും അംഗമായിരുന്നിട്ടും, ‘ഹിന്ദുമതത്തിന്റെ അന്തസത്ത തനിക്ക് ശരിക്കും മനസ്സിലായിട്ടില്ല.ഹിന്ദുമതത്തിന്റെ യഥാർത്ഥ സത്ത മനസ്സിലാക്കാൻ 60 വർഷമെടുത്തു, ‘, നമ്മുടെ കുടുംബം, സുഹൃത്തുക്കൾ, സഹപ്രവർത്തകർ, കൂടാതെ ലോകം മുഴുവനുമായും എങ്ങനെ ഐക്യത്തോടെ ജീവിക്കാമെന്ന് ഇത് നമ്മെ പഠിപ്പിക്കുന്നുവെന്ന് അദ്ദേഹം പറഞ്ഞു.

‘മറ്റ് സർവ്വകലാശാലകൾ വിദ്യാർത്ഥികൾക്ക് ഉപജീവനമാർഗം നേടുന്നതിന് അറിവ് നൽകിയേക്കാം. HUA പോലുള്ള ഒരു സ്ഥാപനത്തിന് മാത്രമേ ഒരു വിദ്യാർത്ഥിയെ അവരുടെ ജീവിതം എങ്ങനെ ജീവിക്കണമെന്ന് പഠിപ്പിക്കുന്ന ഹിന്ദു വിജ്ഞാനം നൽകാൻ കഴിയൂയെന്ന് അദ്ദേഹം കൂട്ടിച്ചേർത്തു.