കൊച്ചി: ലോകത്തെ മാറ്റിമറിക്കാൻ ശേഷിയുള്ള യുവശക്തിയാണ് ഇന്ത്യയുടെ കൈമുതലെന്ന് കൊച്ചിയിലെ യുവം വേദിയിൽ പ്രധാനമന്ത്രി നരേന്ദ്ര മോദി. ശങ്കരാചാര്യരും ശ്രീനാരായണ ഗുരുവും ജനിച്ച മണ്ണാണ് കേരളം. ഈ മഹാത്മാക്കൾ യുവാക്കൾക്ക് പ്രചോദനമായവരാണെന്നും പ്രധാനമന്ത്രി പറഞ്ഞു.
ഇന്ത്യ ലോകത്തിലെ അതിവേഗം വളരുന്ന സാമ്പത്തിക ശക്തിയാണ്. ലോകം ഇന്ത്യ നിർണയിക്കുന്ന പാതയിലൂടെ മുന്നോട്ട് പോകാൻ തയ്യാറെടുക്കുന്നു. ലോകത്തെ നയിക്കാനുള്ള ഈ ഇന്ത്യൻ ദൗത്യത്തിൽ മലയാളി യുവാക്കളും അവരവരുടേതായ പങ്ക് വഹിക്കുന്നുവെന്നും പ്രധാനമന്ത്രി പറഞ്ഞു.
രാജ്യത്തെ മുൻ സർക്കാരുകൾ കുംഭകോണങ്ങളുടെ പേരിൽ അറിയപ്പെട്ടപ്പോൾ, ബിജെപി നയിക്കുന്ന കേന്ദ്ര സർക്കാർ വികസനത്തിന്റെ പേരിൽ അറിയപ്പെടുന്നു. പ്രധാനമന്ത്രി എന്ന നിലയിൽ തനിക്ക് ഏറ്റവും വിശ്വാസം യുവതയിലാണ്. കേരളത്തിലെ ദേശീയ പാതകളും റെയിൽവേയും ജലപാതകളും വികസിക്കുന്നു. അതുവഴി യുവാക്കളുടെ തൊഴിലവസരങ്ങളും വർദ്ധിക്കുന്നുവെന്നും യുവം വേദിയിൽ യുവാക്കളെ അഭിസംബോധന ചെയ്യവെ പ്രധാനമന്ത്രി പറഞ്ഞു.
