മലപ്പുറം: നിർധനയായ വീട്ടമ്മയുടെ വിധവാ പെൻഷൻ തുക വ്യാജ ഒപ്പിട്ട് തട്ടിയെടുത്ത സംഭവത്തിൽ ബാങ്ക് ജീവനക്കാരനും ഡിവൈഎഫ്ഐ നേതാവുമായ കെ.ടി. നൗഫലിനെതിരെ സസ്പെൻഷൻ നടപടി. പെരിന്തൽമണ്ണ അർബൻ ബാങ്കിന്റെ മൂർക്കനാട് ശാഖയിലാണ് ക്രമക്കേട് നടന്നത്. സിപിഎം മങ്കട ഏരിയ കമ്മിറ്റി അംഗവും ഡിവൈഎഫ്ഐ മുൻ ഭാരവാഹിയുമായ നൗഫൽ ബാങ്ക് ജീവനക്കാരനായി പ്രവർത്തിച്ചു വരികയായിരുന്നു.
കഴിഞ്ഞ പത്തു മാസമായി മുടങ്ങിക്കിടന്ന വിധവാ പെൻഷൻ തുകയായ 20,000 രൂപയാണ് നൗഫൽ വ്യാജ ഒപ്പിട്ട് തട്ടിയെടുത്തത്. ദീർഘനാളായി പെൻഷൻ തുക ലഭിക്കാത്തതിനെ തുടർന്ന് പരാതിയുമായി വീട്ടമ്മ ബാങ്ക് അധികൃതരെ സമീപിച്ചതോടെയാണ് തട്ടിപ്പ് വെളിച്ചത്തുവരുന്നത്.
വീട്ടമ്മയുടെ പരാതിയുടെ അടിസ്ഥാനത്തിൽ ബാങ്ക് മാനേജ്മെന്റ് നടത്തിയ ആഭ്യന്തര അന്വേഷണത്തിൽ നൗഫൽ രേഖകളിൽ വ്യാജമായി ഒപ്പിട്ടാണ് തുക പിൻവലിച്ചതെന്ന് വ്യക്തമാവുകയായിരുന്നു. അന്വേഷണ റിപ്പോർട്ടിന്റെ വെളിച്ചത്തിൽ ജീവനക്കാരനെതിരെ അടിയന്തര നടപടിയെടുക്കുകയും സർവീസിൽ നിന്ന് സസ്പെൻഡ് ചെയ്യുകയുമായിരുന്നു.
നിർധനയായ വീട്ടമ്മയുടെ അർഹതപ്പെട്ട പെൻഷൻ തുക ബാങ്ക് ജീവനക്കാരൻ തന്നെ വ്യാജ ഒപ്പിട്ട് തട്ടിയെടുത്ത സംഭവം പ്രദേശത്ത് വലിയ പ്രതിഷേധത്തിനും ജനരോഷത്തിനും ഇടയാക്കിയിട്ടുണ്ട്. സംഭവം വിവാദമായതോടെ വിഷയത്തിൽ കൂടുതൽ അന്വേഷണം നടത്താനാണ് ബാങ്ക് ഭരണസമിതിയുടെ തീരുമാനം.
