ന്യൂഡൽഹി : തന്റെ മകൾ അക്ഷത മൂർത്തിയാണ് അവളുടെ ഭർത്താവ് ഋഷി സുനകിനെ ബ്രിട്ടീഷ് പ്രധാനമന്ത്രിയാക്കിയത് എന്ന് സുധാ മൂർത്തി. ഇത് ഒരു ഭാര്യയ്ക്ക് എങ്ങനെ ഭർത്താവിനെ മാറ്റാൻ സാധിക്കുമെന്ന് വ്യക്തമാക്കുന്നു. തന്റെ മകൾ ഋഷി സുനക്കിന്റെ ജീവിതത്തെ പല തരത്തിൽ സ്വാധീനിച്ചിട്ടുണ്ടെന്നും സുധ മൂർത്തി പറഞ്ഞു.
‘ഞാൻ എന്റെ ഭർത്താവിനെ ഒരു ബിസിനസുകാരനാക്കി, എന്റെ മകൾ അവളുടെ ഭർത്താവിനെ യുകെയുടെ പ്രധാനമന്ത്രിയാക്കി. ഇതിനെല്ലാം കാരണം ഭാര്യയാണ്. ഭാര്യക്ക് എങ്ങനെ ഭർത്താവിനെ മാറ്റാൻ കഴിയുമെന്ന് ഇതിലൂടെ വ്യക്തമാകും. എനിക്ക് എന്റെ ഭർത്താവിനെ മാറ്റാൻ കഴിഞ്ഞില്ല. അതുകൊണ്ട് ഞാൻ എന്റെ ഭർത്താവിനെ ഒരു ബിസിനസുകാരനാക്കി. മകൾ അവളുടെ ഭർത്താവിനെ പ്രധാനമന്ത്രിയും” സുധ മൂർത്തി പറഞ്ഞു.
2009-ലാണ് ഇൻഫോസിസ് സ്ഥാപകൻ നാരായണ മൂർത്തിയുടെയും സുധ മൂർത്തിയുടെയും മകൾ അക്ഷത മൂർത്തിയെ ഋഷി സുനക് വിവാഹം കഴിച്ചത്. ”ഞങ്ങളുടെ മരുമകന്റെ പൂർവ്വീകർ 150 വർഷമായി ഇംഗ്ലണ്ടിലാണ് താമസിക്കുന്നത്. പക്ഷേ അവർ വിശ്വാസങ്ങളെ മുറുകെ പിടിക്കുന്നവരാണ്.”
”മൂർത്തി കുടുംബം, എല്ലാ വ്യാഴാഴ്ചയും വ്രതം അനുഷ്ഠിക്കുന്ന ഒരു പാരമ്പര്യം പണ്ടേ പിന്തുടരുന്നുണ്ട്. വ്യാഴാഴ്ചയാണ് ഇൻഫോസിസ് ആരംഭിച്ചത്. രാഘവേന്ദ്ര സ്വാമിയെ പ്രാർത്ഥിക്കാൻ എല്ലാ വ്യാഴാഴ്ചയും പോകാറുണ്ട്. ഋഷി സുനകും വ്യാഴാഴ്ചകളിലാണ് വ്രതമനുഷ്ഠിക്കാറുള്ളത്”സുധ മൂർത്തി പറഞ്ഞു.
Discussion about this post