വിമാനത്തിന്റെ വലിപ്പമുള്ള ഛിന്നഗ്രഹം ഭൂമിയോടടുക്കുന്നു; മുന്നറിയിപ്പുമായി നാസ

വിമാനത്തിന്റെ വലിപ്പമുള്ള വലിയൊരു ഛിന്നഗ്രഹം ഭൂമി ലക്ഷ്യമാക്കി നീങ്ങുന്നുവെന്നും, ഇന്ന് അത് ഭൂമിയോട് ഏറ്റവും അടുത്തെത്തുമെന്നുള്ള മുന്നറിയിപ്പുമായി നാസ. 100 അടിയോളം വലിപ്പമുള്ള ഛിന്നഗ്രഹമാണിത്. ഭൂമിയുടെ 6.3 ദശലക്ഷം കിലോമീറ്റർ അകലെ കൂടി ഇത് കടന്നു പോകുമെന്നാണ് ശാസ്ത്രജ്ഞർ അറിയിച്ചിരിക്കുന്നത്. മണിക്കൂറിൽ 23,596 കിലോമീറ്റർ വേഗതയിലാണ് ഇത് സഞ്ചരിക്കുന്നത്.

എച്ച് വൈ 3 എന്ന പേരിലാണ് ഇതിനെ വിളിക്കുന്നത്. അമോർ ഗ്രൂപ്പ് ഓഫ് അസ്‌ട്രോയ്ഡ്‌സിന്റെ ഭാഗമായിട്ടുള്ള ഛിന്നഗ്രഹമാണിതെന്നാണ് ശാസ്ത്രജ്ഞർ പറയുന്നത്. ഇത് ഭൂമിയുടെ ഭ്രമണപഥം കടക്കാൻ സാദ്ധ്യതയില്ലെങ്കിലും, ചൊവ്വയുടെ ഭ്രമണപഥം കടക്കുമെന്നാണ് വിവരം.

2023 എച്ച്‌വി, 2018 വിഎസ്6 എന്നീ രണ്ട് ഛിന്നഗ്രഹങ്ങളെകുറിച്ചും നാസ മുന്നറിയിപ്പ് നൽകുന്നു. 2023 എച്ച്‌വി ഭൂമിയോട് 1.38 ദശലക്ഷം കിലോമീറ്റർ അടുത്ത് വരെ എത്തും, രണ്ടാമത്തേതാകട്ടെ ഭൂമിയുടെ 2 ദശലക്ഷം കിലോമീറ്റർ അകലെ കൂടിയാണ് കടന്നു പോകുന്നത്. ഭൂമിയുടെ ഏറ്റവും അടുത്ത് കൂടി കടന്നു പോകുന്ന ഛിന്നഗ്രഹങ്ങളെ പ്രത്യേകമായി നിരീക്ഷിക്കാറുണ്ട്.

ഭൂമിയിൽ നിന്ന് 7.5 ദശലക്ഷം കിലോമീറ്ററിനുള്ളിൽ കടന്നു പോകുന്ന ഛിന്നഗ്രഹങ്ങളെ ട്രാക്ക് ചെയ്യാനുള്ള സംവിധാനം നാസയിലുണ്ട്. 150 മീറ്ററിലധികം വലിപ്പമുള്ള ഏതൊരു വസ്തുവും ഭൂമിയോട് അടുത്ത് കൂടി കടന്നു പോകുമ്പോൾ അങ്ങേയറ്റം അപകടകരമായ വസ്തുവെന്നാണ് നാസ വിശേഷിപ്പിക്കുന്നത്.