ശ്രീനഗർ: ജമ്മു കശ്മീരിൽ അതിർത്തിവഴി നുഴഞ്ഞു കയറ്റം നടന്നതായി സൂചന. വിവരത്തിന്റെ അടിസ്ഥാനത്തിൽ സുരക്ഷാ സേനയുടെ പരിശോധ പുരോഗമിക്കുകയാണ്. പൂഞ്ചിലാണ് സംഭവം.
നഗരത്തിൽ രാവിലെ ദുരൂഹ സാഹചര്യത്തിൽ ആയുധ ധാരികളായ ചിലരെ പ്രദേശവാസികൾ കണ്ടിരുന്നു. ഇക്കാര്യം ഇവർ വേഗം സുരക്ഷാ സേനയെ അറിയിക്കുകയായിരുന്നു. ഇതോടെയാണ് സുരക്ഷാ സേന തിരച്ചിൽ ആരംഭിച്ചത്. ഖഖാ നവാൻ, പുരണി പൂഞ്ച്, ജെർനലി മൊഹല്ല എന്നിവിടങ്ങളിലാണ് പരിശോധന.
സംശയമുള്ള ചിലർ നഗരത്തിൽ എത്തിയതായി വിവരം ലഭിച്ചതിന് പിന്നാലെ ജാഗ്രതാ നിർദ്ദേശം പുറപ്പെടുവിച്ചു. മുൻകരുതലിന്റെ ഭാഗമായി രണ്ട് സ്കൂളുകൾ അടച്ചിട്ടു. ചെക്പോസ്റ്റുകൾ സ്ഥാപിച്ച് വാഹന പരിശോധനയും ആരംഭിച്ചു. നഗരത്തിൽ കൂടുതൽ സുരക്ഷാ സേനാംഗങ്ങളും വിന്യസിച്ചിട്ടുണ്ട്.
കഴിഞ്ഞ മാസം 20 ന് പൂഞ്ചിലുണ്ടായ ഭീകരാക്രമണത്തിൽ 5 ജവാന്മാർ വീരമൃത്യുവരിച്ചിരുന്നു. ഈ ആക്രമണം നടത്തിയ ഭീകരർക്കായി നിലവിൽ ഊർജ്ജിത പരിശോധന തുടരുകയാണ്. ഇതിനിടെയാണ് നഗരത്തിൽ സംശയാസ്പദമായ സാഹചര്യത്തിൽ ചിലരെ കണ്ടതായുള്ള വിവരം ലഭിക്കുന്നത്. ഇവരാണോ പ്രതികൾ എന്നാണ് സുരക്ഷാ സേന സംശയിക്കുന്നത്.
Discussion about this post