ചെന്നൈ: കർണാടകയിൽ സിദ്ധരാമയ്യയുടെ നേതൃത്വത്തിലുള്ള സർക്കാർ ഒരു വർഷത്തിനുള്ളിൽ താഴെ വീഴുമെന്ന് ബിജെപി നേതാവ് കെ അണ്ണാമലൈ. 2024 വരെ രണ്ട് നേതാക്കളും തമ്മിൽ പ്രശ്‌നങ്ങളൊന്നും ഉണ്ടാക്കാതെ ഇരുന്നാൽ സിദ്ധരാമയ്യയ്ക്കും ഡികെ ശിവകുമാറിനും സമാധാനത്തിനുള്ള നൊബേൽ സമ്മാനം നൽകണമെന്ന് അണ്ണാമലൈ പരിഹസിച്ചു.
” ഒരു വർഷത്തിനുള്ളിൽ കർണാടകയിലെ സർക്കാർ ചീട്ട് കൊട്ടാരം പോലെ താഴെ വീഴും. 2024നുള്ളിൽ ശിവകുമാറും സിദ്ധരാമയ്യയും തമ്മിൽ ഏറ്റുമുട്ടിയില്ലെങ്കിൽ ഇരുവർക്കും സമാധാനത്തിനുള്ള നൊബേൽ സമ്മാനം നൽകണം. അവരുടെ സർക്കാരിന്റെ ഘടന തന്നെ ആകെ പ്രശ്‌നത്തിലാണ്. ഒരു മുഖ്യമന്ത്രിക്ക് രണ്ടര വർഷവും മറ്റൊരു മുഖ്യമന്ത്രിക്ക് രണ്ടര വർഷവും കിട്ടുമെന്നൊക്കെയാണ് നമ്മൾ പത്രത്തിൽ വായിക്കുന്നത്.
ഒരു മുഖ്യമന്ത്രിക്ക് 10 മന്ത്രിമാർ ഉപമുഖ്യമന്ത്രിക്ക് 10 മന്ത്രിമാർ പിന്നെ എഐസിസിക്ക് 10 മന്ത്രിമാർ. ഇങ്ങനെയൊരു ഘടന ലോകത്ത് എവിടെയെങ്കിലും നിങ്ങൾ കേട്ടിട്ടുണ്ടോ എന്നും അണ്ണാമലൈ ചോദിച്ചു. സത്യപ്രതിജ്ഞാചടങ്ങ് പ്രതിപക്ഷ ഐക്യത്തെ വ്യക്തമാക്കുന്നതാണെന്ന കോൺഗ്രസ് വാദത്തേയും അണ്ണാമലൈ പരിഹസിച്ചു. കോൺഗ്രസിനുള്ളിൽ തന്നെ ഐക്യം ഇല്ലാത്ത സാഹചര്യമാണ്, പിന്നെ എന്ത് പ്രതിപക്ഷ ഐക്യമാണ് അവർ ഉദ്ദേശിക്കുന്നതെന്നും അണ്ണാമലൈ പറഞ്ഞു.
Discussion about this post