ടോക്കിയോ: വനിതകളുടെ ജൂനിയർ ഏഷ്യാ കപ്പ് ഹോക്കി 2023 ടൂർണമെന്റിന്റെ സെമിയിൽ ജപ്പാനെ പരാജയപ്പെടുത്തി ഇന്ത്യ ഫൈനലിൽ. കടുത്ത പോരാട്ടത്തിൽ സുനേലിറ്റ ടോപ്പോ 47 ാം മിനിറ്റിൽ നേടിയ ഗോളിലാണ് ഇന്ത്യ കലാശക്കളിക്ക് ടിക്കറ്റ് ഉറപ്പിച്ചത്.
ഇത് രണ്ടാം തവണയാണ് ജൂനിയർ വനിതാ ഏഷ്യാ കപ്പ് ഹോക്കിയിൽ ഇന്ത്യ ഫൈനലിൽ എത്തുന്നത്. നേരത്തെ 2012 ലായിരുന്നു എത്തിയത്.
ഫൈനലിൽ കടന്നതോടെ അന്താരാഷ്ട്ര ഹോക്കി ഫെഡറേഷന്റെ ജൂനിയർ വനിതാ ഹോക്കി ലോകകപ്പിലും ഇന്ത്യ സ്ഥാനം ഉറപ്പിച്ചു. നവംബർ 29 മുതൽ ഡിസംബർ 10 വരെ ചിലിയിലെ സാന്റിയാഗോയിലാണ് ലോകകപ്പ് നടക്കുക. ഏഷ്യാ കപ്പിൽ മുന്നിലെത്തുന്ന മൂന്ന് ടീമുകൾക്ക് ലോകകപ്പിലേക്ക് യോഗ്യത ലഭിക്കും.
ജപ്പാന്റെ കടുത്ത വെല്ലുവിളി നേരിട്ടാണ് ജൂനിയർ വനിതാ ടീം രാജ്യത്തെ ഫൈനലിൽ എത്തിച്ചത്. നിരവധി പെനാൽറ്റി കോർണറുകൾ ലഭിച്ചെങ്കിലും ജപ്പാന് അതൊന്നും ഗോളുകളാക്കി മാറ്റാൻ കഴിഞ്ഞില്ല. രണ്ടാം പകുതിയുടെ തുടക്കത്തിൽ തന്നെ ഇരു ടീമുകളും പരസ്പരം ആക്രമിച്ചുളള കളിയായിരുന്നു പുറത്തെടുത്തത്.
ഒന്നിലധികം ഘട്ടങ്ങളിൽ ജപ്പാൻ ഗോൾ പോസ്റ്റ് ലക്ഷ്യമിട്ട് മികച്ച ഷോട്ടുകൾ പായിച്ചെങ്കിലും
ഇന്ത്യൻ ഗോൾകീപ്പർ മധൂരി കിൻഡോയുടെ തകർപ്പൻ സേവുകൾ രക്ഷയായി. ചൈനയെ തോൽപിച്ച് ഫൈനലിലെത്തിയ കൊറിയയാണ് കലാശക്കളിയിൽ ഇന്ത്യയുടെ എതിരാളി. ഞായറാഴ്ച ഇന്ത്യൻ സമയം ഉച്ചയ്ക്ക് 2.30 നാണ് ഫൈനൽ.
Discussion about this post