രോഹിത് ശർമ്മയുടെ സമീപകാലത്തെ ഉജ്ജ്വല പ്രകടനങ്ങൾക്ക് മുന്നിൽ ബിസിസിഐ ചീഫ് സെലക്ടർ അജിത് അഗാർക്കർ തന്റെ മുൻ നിലപാടിൽ ഇപ്പോൾ ഖേദിക്കുന്നുണ്ടാകാമെന്ന് മുൻ ഇന്ത്യൻ താരം സദഗോപൻ രമേശ്. ഈ വർഷം ആദ്യം നടന്ന ഇംഗ്ലണ്ട് പര്യടന വേളയിൽ, പരമ്പരയ്ക്ക് ശേഷം രോഹിതിനെ ടീമിൽ തുടരാൻ അനുവദിക്കരുതെന്നും ഇംഗ്ലണ്ട് പരമ്പരയോടെ അദ്ദേഹത്തിന്റെ കരിയർ അവസാനിപ്പിക്കണമെന്നുമുള്ള നിലപാടിലായിരുന്നു അഗാർക്കർ എന്ന് റിപ്പോർട്ടുകൾ പുറത്തുവന്നിരുന്നു. എന്നാൽ ബിസിസിഐ ഈ വാദങ്ങളെ തള്ളിക്കളയുകയും സെലക്ടർമാരുടെ പദ്ധതികളുടെ ഭാഗമായിരിക്കുന്നിടത്തോളം രോഹിതിനെ ടീമിലേക്ക് പരിഗണിക്കുമെന്ന് വ്യക്തമാക്കുകയും ചെയ്തിരുന്നു. ഈ വിവാദങ്ങൾക്കിടയിലും ഇംഗ്ലണ്ടിനെതിരായ അവസാന ഏകദിനത്തിൽ 138 റൺസും തുടർന്ന് വെസ്റ്റ് ഇൻഡീസിനെതിരായ രണ്ടാം ഏകദിനത്തിൽ തകർപ്പൻ സെഞ്ചുറിയും നേടി രോഹിത് വിമർശകരുടെ വായടപ്പിക്കുകയായിരുന്നു.
ഈ വിഷയത്തിൽ പ്രതികരിച്ച സദഗോപൻ രമേശ്, തന്റെ യൂട്യൂബ് ചാനലിലൂടെയാണ് അഗാർക്കറുടെ നിലപാടിനെ വിമർശിച്ചത്. വരുന്ന ലോകകപ്പ് ടീമിൽ രോഹിത് ഉണ്ടാകരുതെന്ന ഒറ്റക്കാലിലെ നിലപാടാണ് അഗാർക്കർ സ്വീകരിച്ചതെന്നും, അതിനാലാണ് അദ്ദേഹത്തിന്റെ കരാർ നീട്ടിനൽകാത്തതെന്നുമാണ് രമേശ് ചൂണ്ടിക്കാണിക്കുന്നത്. എന്നാൽ വയസ്സ് വെറുമൊരു അക്കമാണെന്ന് രോഹിത് തുടർച്ചയായി തെളിയിച്ചുകൊണ്ടിരിക്കുകയാണ്. 50 ഓവർ ഫീൽഡ് ചെയ്ത ശേഷം ദീർഘനേരം ക്രീസിൽ നിന്ന് സെഞ്ചുറി നേടാൻ കാണിച്ച മികവ് അദ്ദേഹത്തിന്റെ ഉയർന്ന കായികക്ഷമതയ്ക്കുള്ള തെളിവാണ്. നിലവിൽ രോഹിത് ബാറ്റ് ചെയ്യുന്നത് കണ്ട് തന്റെ തീരുമാനത്തിൽ അഗാർക്കർ ഖേദിക്കുന്നുണ്ടാകുമെന്നും രമേശ് കൂട്ടിച്ചേർത്തു.
ഭാവിയിൽ ടീമിലെ സ്ഥാനം സംബന്ധിച്ച് അനിശ്ചിതത്വങ്ങൾ നിലനിൽക്കുമ്പോഴും രോഹിത് ശർമ്മയും വിരാട് കോഹ്‌ലിയും തമ്മിലുള്ള ആരോഗ്യകരമായ മത്സരത്തെയും രമേശ് പ്രശംസിച്ചു. ഒരാൾ സെഞ്ചുറി നേടിയാൽ തൊട്ടടുത്ത മത്സരത്തിൽ മറ്റേയാളും അത് ആവർത്തിക്കുന്നത് ഇപ്പോൾ പതിവായി മാറിയിരിക്കുകയാണ്. പരിക്കേറ്റ പുലികളെപ്പോലെയാണ് ഇരുതാരങ്ങളും നിലവിൽ ബാറ്റ് ചെയ്യുന്നത്. ഫ്ലാറ്റ് പിച്ചിൽ എതിർ ബൗളർമാർക്കെതിരെ രോഹിത് കാണിക്കുന്ന ആക്രമണോത്സുകതയും ആവേശവും വരും മത്സരങ്ങളിലും ഇന്ത്യക്ക് വലിയ കരുത്താകുമെന്നാണ് വിലയിരുത്തപ്പെടുന്നത്.
