ദുബായ്-ടെൽ അവീവ് ഫ്ലൈദുബായ് വിമാനത്തിൽ വെച്ച് സഹപൈലറ്റിന്റെ അതിക്രൂരമായ ആക്രമണത്തെ ചെറുത്ത് വൻ ദുരന്തം ഒഴിവാക്കിയ ഇന്ത്യൻ പൈലറ്റ് ക്യാപ്റ്റൻ സ്മിത് മച്ചാറുമായി പ്രധാനമന്ത്രി നരേന്ദ്ര മോദി വീഡിയോ കോളിലൂടെ സംസാരിച്ചു. പരിക്കേറ്റ് രക്തത്തിൽ കുളിച്ചു കിടക്കുമ്പോഴും താൻ ഹനുമാൻ ചാലിസ ജപിച്ചുകൊണ്ട് ധൈര്യം വീണ്ടെടുക്കുകയായിരുന്നു എന്ന് സ്മിത് മച്ചാർ പ്രധാനമന്ത്രിയോട് വ്യക്തമാക്കി. തനിക്ക് അതികഠിനമായ വേദനയോ പ്രതിസന്ധിയോ ഉണ്ടാകുമ്പോഴെല്ലാം താൻ ഈ പ്രാർത്ഥനയാണ് ചൊല്ലാറുള്ളതെന്നും അപ്പോഴും താൻ അത് തുടരുകയായിരുന്നു എന്നും അദ്ദേഹം കൂട്ടിച്ചേർത്തു.
ശരീരമാസകലം ഗുരുതരമായി കുത്തേറ്റു വീണിട്ടും പൊരുതിനിന്ന് കോക്പിറ്റിന്റെ വാതിൽ തുറന്നുകൊടുത്ത സ്മിതിന്റെ ധീരതയെ പ്രധാനമന്ത്രി രാജ്യത്തിന് വേണ്ടി പ്രശംസിച്ചു. മറ്റുള്ളവരുടെ ജീവൻ രക്ഷിക്കാൻ സ്വന്തം ജീവൻ പോലും പണയം വെക്കുന്നവരാണ് ഇന്ത്യക്കാർ എന്ന് പ്രഖ്യാപിച്ച പ്രധാനമന്ത്രി സ്മിതിന് എല്ലാവിധ പിന്തുണയും വാഗ്ദാനം ചെയ്തു. പ്രധാനമന്ത്രിയോട് സംസാരിക്കാൻ സാധിച്ചത് വലിയൊരു ഭാഗ്യമായി കരുതുന്നുവെന്നും നരേന്ദ്ര മോദിയാണ് തന്റെ ജീവിതത്തിലെ ഏറ്റവും വലിയ മാതൃകാപുരുഷനെന്നും സ്മിത് വൈകാരികമായി പ്രതികരിച്ചു.
വിമാനത്തിന്റെ നിയന്ത്രണം നഷ്ടപ്പെട്ട് താഴേക്ക് പതിക്കുന്ന ഘട്ടത്തിൽ താൻ എഴുന്നേറ്റില്ലെങ്കിൽ വിമാനത്തിലെ 180 യാത്രക്കാരും കൊല്ലപ്പെടുമായിരുന്നു എന്ന് സ്മിത് ഓർത്തെടുത്തു. ആക്രമണം തുടരുന്നതിനിടയിലും പരമാവധി ശക്തി സംഭരിച്ച് കോക്പിറ്റ് വാതിൽ തുറന്നതോടെയാണ് യാത്രക്കാർക്കും ജീവനക്കാർക്കും ഉള്ളിൽ കടന്ന് അക്രമിയായ സഹപൈലറ്റിനെ കീഴടക്കാൻ സാധിച്ചത്. ധീരനായ ഈ പൈലറ്റിന്റെ വേഗത്തിലുള്ള സുഖപ്രാപ്തിക്കായി രാജ്യമൊട്ടുക്കും പ്രാർത്ഥനയിലാണെന്ന് വ്യക്തമാക്കിയ പ്രധാനമന്ത്രി സ്മിതിന്റെ അമ്മ ഗീതാ ബെൻ പകർന്നുനൽകിയ സംസ്കാരത്തെയും അഭിനന്ദിച്ചു.
