മുംബൈ: മദ്യലഹരിയില് 30 വര്ഷം മുന്പ് നടത്തിയ ഇരട്ട കൊലപാതകത്തെ കുറിച്ച് വെളിപ്പെടുത്തിയ ആള് പിടിയില്. മുംബൈ സ്വദേശി അവിനാശ് പവാര് ആണ് ക്രൈംബ്രാഞ്ചിന്റെ പിടിയിലായത്. കൊലപാതകത്തിന് പിന്നാലെ സ്ഥലത്ത് നിന്ന് മുങ്ങിയ ഇയാള് അമിത് പവാര് എന്ന കള്ളപ്പേരില് ജീവിച്ച് വരികയായിരുന്നു. 19ാം വയസ്സില് ഇയാള് നടത്തിയ കൊലപാതകമാണ് 49ാം വയസ്സില് പുറത്ത് വന്നത്. സുഹൃത്തുക്കള്ക്കൊപ്പം മദ്യപിക്കുമ്പോഴായിരുന്നു സംഭവം. ഇയാളെ കുറിച്ച് വിവരം ലഭിച്ച മുംബൈ ക്രൈംബ്രാഞ്ച് സംഘം ഉടനെ തന്നെ ഇയാളെ കസ്റ്റഡിയില് എടുക്കുകയായിരുന്നു.
1993 ഒക്ടോബറിലാണ് കേസിനാസ്പദമായ സംഭവം. 55 വയസ്സുകാരനേയും ഇയാളുടെ ഭാര്യയേയുമാണ് കവര്ച്ചാ ശ്രമത്തിനിടെ അവിനാശും രണ്ട് സുഹൃത്തുക്കളും ചേര്ന്ന് കൊലപ്പെടുത്തിയത്. അവിനാശിന്റെ കൂട്ടാളികളെ പോലീസ് അന്ന് തന്നെ പിടികൂടിയിരുന്നു. മുംബൈയില് നിന്ന് ഡല്ഹിയിലേക്ക് ഒളിവില് പോയ അവിനാശ്, പുതിയ പേര് സ്വീകരിച്ച് അവിടെ താമസിച്ച് വരികയായിരുന്നു. ഇതിനിടെയാണ് സുഹത്തുക്കളോടൊപ്പം നടന്ന മദ്യപാന സദസിനിടെ ഇയാള് അബദ്ധത്തില് കാര്യങ്ങളെല്ലാം വിളിച്ച് പറയുന്നത്.
ലോണാവാലയില് നടന്ന ഇരട്ടക്കൊലപാതകത്തിലെ പ്രധാന പ്രതിയാണ് അവിനാശ് എന്ന് ഡെപ്യൂട്ടി പോലീസ് കമ്മീഷണര് രാജ് തിലക് പറഞ്ഞു. ലോണാവാലയില് അവിനാസ് ഒരു കട നടത്തിയിരുന്നു. അതിനു സമീപത്തു താമസിച്ചിരുന്ന ദമ്പതികളെയാണ് കവര്ച്ചാ ശ്രമത്തിനിടെ കൊലപ്പെടുത്തിയത്. അവിനാഷാണ് കടയോടു ചേര്ന്നുള്ള വീട്ടില് കവര്ച്ച നടത്താന് പദ്ധതിയിട്ടതും രണ്ടു പേരെ സഹായികളായി കൂട്ടിയതും. കവര്ച്ചാ ശ്രമത്തിനിടെ ദമ്പതികളെ ഇവര് കൊലപ്പെടുത്തുകയായിരുന്നുവെന്നും രാജ് തിലക് വ്യക്തമാക്കി.
Discussion about this post