ലഡാക്ക്: അന്താരാഷ്ട്ര യോഗാ ദിനത്തോടനുബന്ധിച്ച് ലഡാക്കിലെ പാംഗോങ് സോ തടാകത്തിൽ യോഗ അവതരിപ്പിച്ച് കരസേന ഉദ്യോഗസ്ഥർ. കരസേനാ മേധാവി ജനറൽ മനോജ് പാണ്ഡെയുടെ നേതൃത്വത്തിൽ ഡൽഹി കന്റോൺമെന്റിൽ യോഗ അവതരിപ്പിച്ചു.പ്രതിരോധമന്ത്രി രാജ്നാഥ് സിംഗ്, നാവികസേനാ മേധാവി അഡ്മിറൽ ആർ ഹരികുമാർ എന്നിവർ കൊച്ചിയിൽ ഇന്ത്യ തദ്ദേശീയമായി വികസിപ്പിച്ച ഐഎൻഎസ് വിക്രാന്തിൽ വച്ചാണ് യോഗ അവതരിപ്പിച്ചത്.
ഇന്ന് യുഎൻ ആസ്ഥാനത്ത് നടക്കുന്ന യോഗാ ദിനാചരണത്തിന് പ്രധാനമന്ത്രി നരേന്ദ്രമോദിയാണ് നേതൃത്വം നൽകുന്നത്. 180 രാജ്യങ്ങളിൽ നിന്നുള്ള പ്രതിനിധികൾ ചടങ്ങിൽ പങ്കെടുക്കും. ഇന്ന് വൈകിട്ട് 5.30നാണ് പരിപാടി ആരംഭിക്കുന്നത്. 2014ൽ ഐക്യരാഷ്ട്രസഭയുടെ പൊതുസഭയെ അഭിസംബോധന ചെയ്ത പ്രധാനമന്ത്രി നരേന്ദ്ര മാദിയാണ് അന്താരാഷ്ട്ര യോഗാദിനം എന്ന ആശയം ലോകത്തിന് മുന്നിൽ അവതരിപ്പിക്കുന്നത്. പിന്നാലെയാണ് ജൂൺ 21 അന്താരാഷ്ട്ര യോഗാദിനമായി ലോകം ആഘോഷിക്കാൻ ആരംഭിച്ചത്.
വസുധൈവ കുടംബത്തിന് യോഗ എന്നതാണ് ഈ വർഷത്തെ യോഗാദിനത്തിന്റെ ആശയം. അന്താരാഷ്ട്ര യോഗ ദിനത്തിലൂടെ യോഗ ഒരു ആഗോള പ്രസ്ഥാനമായി മാറിയെന്ന് പ്രധാനമന്ത്രി നരേന്ദ്രമോദി ഇന്ന് നൽകിയ യോഗാദിന സന്ദേശത്തിൽ പറഞ്ഞു. ലോകം ഒരു കുടുംബമായി മാറുകയാണ്. വസുധൈവ കുടുംബകം എന്നതിനെ അന്വർത്ഥമാക്കിക്കൊണ്ട് ലോകമെമ്പാടുമുള്ള കോടിക്കണക്കിന് ജനങ്ങൾ യോഗ ചെയ്യുന്നുണ്ടെന്നും പ്രധാനമന്ത്രി പറഞ്ഞു.
Discussion about this post