തിരുവനന്തപുരം : നൂലിൽ കുടുങ്ങിക്കിടന്ന് ജീവന് വേണ്ടി കേണപേക്ഷിച്ച കാക്കയെ രക്ഷപ്പെടുത്തി കേരള ഫയർഫോഴ്‌സ്. തിരുവനന്തപുരത്താണ് സംഭവം. രാത്രി ഇരുട്ടി വെളുക്കുവോളം നൂലിൽ തലകീഴായി തൂങ്ങിക്കിടന്ന കാക്കയെ കേരള ഫയർ ആൻഡ് റെസ്‌ക്യൂ അംഗങ്ങളെത്തിയാണ് രക്ഷിച്ചത്. ഈ സംഭവങ്ങൾ വിവരിച്ചുകൊണ്ട് മാദ്ധ്യമപ്രവർത്തകനായ ഡോ കിഷോർ ജി പങ്കുവെച്ച കുറിപ്പാണ് സമൂഹമാദ്ധ്യമങ്ങളിൽ ശ്രദ്ധ നേടുന്നത്.
കുടുങ്ങിക്കിടന്ന കാക്കയെ രക്ഷിക്കാൻ ഏറെ തവണ ശ്രമം നടത്തിയെങ്കിലും പാളിപ്പോയി എന്ന് ഡോ കിഷോർ കുറിപ്പിൽ പറഞ്ഞു. അങ്ങനെയാണ് തിരുവനന്തപുരത്തെ കേരള ഫയർ ആൻഡ് റെസ്‌ക്യൂ ഫോഴ്‌സിനെ വിവരം അറിയിക്കുന്നത്. ഒരു കാക്കയെ രക്ഷിക്കാൻ ഫയർഫോഴ്‌സ് ഒക്കെ വരുമോ എന്ന സംശയം ഉണ്ടായിരുന്നു.
അപ്പോഴാണ് അവിടെ കൂടിനിന്നവരെ അതിശയിപ്പിച്ചുകൊണ്ട് തൊട്ടുമുന്നിൽ വന്നു ഫയർഫോഴ്‌സ് വാഹനം നിൽക്കുന്നത്. പിന്നീടെല്ലാം വളരെ വേഗത്തിൽ ആയിരുന്നു. കരുതലോടെയും സൂക്ഷ്മതയോടെയും ആണ് ഒരു ജീവൻ രക്ഷിക്കാൻ അവർ ആത്മാർത്ഥമായി പരിശ്രമിച്ചത്. ഒടുവിൽ ആ കാക്കയെ ആകാശത്തിലേക്ക് പറത്തിവിട്ട ശേഷമാണ് അവർ മടങ്ങിയത് എന്നും കുറിപ്പിൽ പറയുന്നു. ഇതോടൊപ്പം കേരള ഫയർ ആൻഡ് റെസ്‌ക്യൂ സർവീസിന് നന്ദിയും രേഖപ്പെടുത്തുന്നുണ്ട്.
ഫേസ്ബുക്ക് പോസ്റ്റിന്റെ പൂർണരൂപം
ആരോ വലിച്ചുകെട്ടിയ ഒരു നൂലിൽ കുടുങ്ങിക്കിടക്കുകയായിരുന്ന ഈ കാക്കയെ ഞാൻ ശ്രദ്ധിക്കുന്നത് കഴിഞ്ഞദിവസം രാത്രിയിലായിരുന്നു.
ഒരു രാത്രി ഇരുട്ടി വെളുക്കുവോളം ഇതേ കിടപ്പ് തന്നെ കിടന്നു. എന്നിട്ടും ജീവൻ ബാക്കിയുണ്ടായിരുന്നു. രാവിലെ ഉണരുന്നത് തന്നെ മറ്റു കാക്കകളുടെ കരച്ചിൽ കേട്ടു കൊണ്ടാണ്. രക്ഷിക്കാൻ നടത്തിയ ശ്രമങ്ങളൊക്കെ പാളി. അങ്ങനെയാണ് തിരുവനന്തപുരത്തെ കേരള ഫയർ ആൻഡ് റെസ്‌ക്യൂ ഫോഴ്‌സിനെ ഞാൻ വിവരം അറിയിക്കുന്നത്.
ഇതറിഞ്ഞ പലരും ചിരിയടക്കി എന്നോട് ചോദിച്ചു, ഒരു കാക്കയെ രക്ഷിക്കാൻ ഫയർഫോഴ്‌സ് ഒക്കെ വരുമോ…?ആ സംശയം എനിക്കും ഉണ്ടായിരുന്നു. കണ്ണിനു മുന്നിൽ തലകീഴായി ജീവനുവേണ്ടി കേണപേക്ഷിക്കുന്ന പോലെ തോന്നി ആ കാക്കയുടെ പെടച്ചിൽ കണ്ടപ്പോൾ. എത്രയായാലും ഒരു ജീവൻ ആണല്ലോ. അതിനിടെ ഫയർഫോഴ്‌സിൽ നിന്നും ജയകുമാർ സാർ വിളിച്ച് കൃത്യമായ ലൊക്കേഷനൊക്കെ ചോദിച്ചു മനസ്സിലാക്കി. അവിടെ കൂടിനിന്നവരെ അതിശയിപ്പിച്ചുകൊണ്ട് തൊട്ടുമുന്നിൽ വന്നു നിൽക്കുന്നു ഫയർഫോഴ്‌സ് വാഹനം!
പിന്നീടെല്ലാം വളരെ വേഗത്തിൽ ആയിരുന്നു എത്ര കരുതലോടെയും സൂക്ഷ്മതയോടെയും ആണ് ഒരു ജീവൻ രക്ഷിക്കാൻ ജയകുമാർ സാറിൻറെ നേതൃത്വത്തിലുള്ള സേനാംഗങ്ങൾ ആത്മാർത്ഥമായി പരിശ്രമിച്ചത്. ഒടുവിൽ ആ കാക്കയെ ആകാശത്തിലേക്ക് പറത്തിവിട്ട ശേഷമാണ് അവർ മടങ്ങിയത്. നന്ദി, കേരള ഫയർ ആൻഡ് റെസ്‌ക്യൂ സർവീസിന്….ഒരു കാക്കയുടെ ജീവന് പോലും വിലയുണ്ടെന്ന് കാണിച്ചു തന്നതിന്.
Discussion about this post