കോട്ടയത്തെ വീട്ടുമുറ്റത്തെ വെള്ളക്കാറിന് തിരുവനന്തപുരത്തെ ചുവന്ന കാറിന്റെ നിയമലംഘന നോട്ടീസ് അയച്ച് എംവിഡി

കോട്ടയം: കാഞ്ഞിരപ്പള്ളിയിലെ വീട്ടുമുറ്റത്ത് പാർക്ക് ചെയ്ത കാറിന് തിരുവനന്തപുരത്ത് നിയമലംഘനം നടത്തിയതിനുള്ള മോട്ടോർവാഹന വകുപ്പിന്റെ പിഴ നോട്ടീസ്. തിരുവനന്തപുരം കൃഷ്ണനഗർ സ്‌നേഹപുരിയിൽവെച്ച് നിയമലംഘനം കണ്ടെത്തിയെന്നാണ് നോട്ടീസിലുള്ളത്.കാഞ്ഞിരപ്പള്ളി മുക്കാലി കൈതപ്പറമ്പിൽ ടി എം സഹിലിനാണ് നോട്ടീസ് കിട്ടിയത്.

വ്യാഴാഴ്ച വൈകിട്ട് അഞ്ചോടെയാണ് KL 34 F 2454 എന്ന നമ്പറിലുള്ള കാർ മോട്ടോർ വാഹന നിയമം ലംഘിച്ചതായി കാണിച്ച് സഹിലിന്റെ മൊബൈൽ ഫോണിൽ സന്ദേശം ലഭിച്ചത്. ഈ സമയം കാഞ്ഞിരപ്പള്ളി പാറത്തോട് മുക്കാലിയിലെ വീട്ടുമുറ്റത്തായിരുന്നു കാർ.

തുടർന്ന് പരിവാഹൻ സൈറ്റിൽ നിന്ന് ഇ-ചെലാൻ ഡൗൺലോഡ് ചെയ്തു. ചുവന്ന നിറത്തിലുള്ള ഹോണ്ടാ കാറാണ് ഇതിൽ കാണിച്ചിരുന്നത്. എന്നാൽ പിഴ കിട്ടിയിരിക്കുന്നത് വെള്ള നിറത്തിലുള്ള ഹ്യുണ്ടായ് ഇയോൺ കാറിനും. മോട്ടോർ വാഹനവകുപ്പിന്റെ പരാതി പരിഹാര സെല്ലിൽ വിവരം അറിയിച്ച് കാത്തിരിക്കുകയാണ് സഹിൽ.