നിന്നു കൊണ്ട് ഓടിക്കുന്ന കാർ ! ഞെട്ടരുത് സംഗതി സത്യമാണ്; പുതിയ ഐഡിയയുമായി ഫോർഡ്

പുതുതലമുറ വാഹനങ്ങൾ വാഗ്ദാനം ചെയ്യുന്ന സ്പെഷ്യൽ ഫീച്ചറുകൾ നിരവധിയാണ്. റിമോട്ട് ഫംഗ്ഷനുകൾ മുതൽ പല ഹൈടെക് ഫീച്ചറുകളും പുതിയ കാലത്തെ വാഹനങ്ങളിൽ നമുക്ക് കാണാൻ കഴിയും. അപ്പോൾ പിന്നെ പരമ്പരാഗത ശൈലിയിലുള്ള ഡ്രൈവിംഗ് സീറ്റിനും ഒരു മാറ്റം ആയാൽ എന്താ ? ഇനിമുതൽ നിന്നുകൊണ്ട് ഡ്രൈവ് ചെയ്യുന്നതിനെക്കുറിച്ച് ഒന്ന് ആലോചിച്ചു നോക്കിക്കേ ? അങ്ങനെയൊരു സ്റ്റാൻഡ്അപ്പ് ഡ്രൈവിംഗ് ഐഡിയ പ്ലാൻ ചെയ്യുകയാണ് ഇപ്പോൾ ഫോർഡ്. മുൻപും വാഹന ലോകത്തെ ഏറ്റവും മികച്ച ചില ആശയങ്ങൾക്ക് പേറ്റന്റ് നേടിയിട്ടുള്ളവരാണ് ഫോർഡ്. ഇപ്പോൾ സ്റ്റാൻഡപ്പ് ഡ്രൈവിങ്ങിനുള്ള പേറ്റന്റിന് ഫോർഡ് സമർപ്പിച്ചിരിക്കുന്ന പേറ്റന്റ് ചിത്രം കമ്പനി തന്നെ വെളിപ്പെടുത്തിയിരിക്കുകയാണ്.

ഈ പേറ്റന്റ് ചിത്രം കാണിക്കുന്നത് നിന്നുകൊണ്ട് നിയന്ത്രിക്കാൻ കഴിയുന്ന ഒരു പുതിയകാല ഫോർഡ് ബ്രോങ്കോ SUV ആണ്. എന്നാൽ ഒരു പേറ്റന്റ് ചിത്രം എന്നതിനപ്പുറം വാണിജ്യാടിസ്ഥാനത്തിൽ ഈ പുതിയ ഡ്രൈവിംഗ് സംവിധാനം അവതരിപ്പിക്കാൻ ഫോർഡ് പദ്ധതിയിടുന്നുണ്ടെന്നോ അല്ലെങ്കിൽ അത് എത്ര വേഗത്തിൽ നടപ്പിലാക്കുമെന്നോ വ്യക്തമല്ല. മിക്കവാറും ഇത് ഒരു ഓപ്ഷണൽ ഫീച്ചറായി നൽകുമെന്നാണ് ഈ മേഖലയിലെ പല വിദഗ്ധരും കരുതുന്നത്. കാർബസ് റിപ്പോർട്ട് ചെയ്യുന്നത് പ്രകാരം 2021ൽ ഫോർഡ് ഈ പേറ്റന്റ് US ലെ പേറ്റന്റ് ആൻഡ് ട്രേഡ്മാർക്ക് ഓഫീസിൽ ഫയൽ ചെയ്തിട്ടുണ്ട്. കഴിഞ്ഞ ആഴ്ച ഈ പേറ്റന്റ് പ്രസിദ്ധീകരിച്ചിട്ടുണ്ട് എന്നും ഈ റിപ്പോർട്ട് പറയുന്നു.

കാർബസ് റിപ്പോർട്ട് അനുസരിച്ച് ബ്രോങ്കോ പോലുള്ള ടോപ്‌ലെസ് വാഹനങ്ങളിൽ ഫോർഡിന്റെ സ്റ്റാൻഡിംഗ്-അപ്പ് ഡ്രൈവിംഗ് സിസ്റ്റം ഉപയോഗിക്കാം. വിൻഡ്ഷീൽഡ് ഹെഡറിൽ ഘടിപ്പിച്ചിരിക്കുന്ന കപ്പാസിറ്റീവ് ടച്ച് നിയന്ത്രണങ്ങളുടെ സാന്നിധ്യം പേറ്റന്റ് വെളിപ്പെടുത്തുന്നു. ഈ നിയന്ത്രണങ്ങൾ ഉപയോഗിച്ച് ഡ്രൈവർക്ക് വാഹനം നിന്നുകൊണ്ട് ഓടിക്കാൻ കഴിയും. ത്രോട്ടിൽ, ബ്രേക്ക്, സ്റ്റിയറിംഗ് തുടങ്ങിയ അടിസ്ഥാന പ്രവർത്തനങ്ങളും ഇതോടൊപ്പം നിയന്ത്രിക്കാനാകും.

ക്യാബിനിനുള്ളിലെ ഡ്രൈവറുടെ സ്ഥാനത്തെ അടിസ്ഥാനമാക്കി സ്റ്റാൻഡിംഗ്-അപ്പ് ഡ്രൈവിംഗ് സിസ്റ്റം സ്വയമേവ സജീവമാകുമെന്നതാണ് ഫോർഡ് ബ്രോങ്കോ SUV യുടെ സവിശേഷതയായി പേറ്റന്റ് ഇമേജ് റിപ്പോർട്ട് സൂചിപ്പിക്കുന്നത്. ഡ്രൈവർ നിൽക്കുകയാണോ , ഇരിക്കുകയാണോ, മുട്ട് കുത്തുന്നുണ്ടോ, വശത്തേക്ക് ചാരുന്നുണ്ടോ എന്നൊക്കെ തിരിച്ചറിയാൻ സെൻസറുകൾ ഉപയോഗിക്കപ്പെടും . ഭാഗികമായി ഇരിക്കുന്നതോ നിൽക്കുന്നതോ ആയ സ്ഥാനം സിസ്റ്റം കണ്ടെത്തിയാലുടൻ, വിൻഡ്ഷീൽഡ് ഹെഡറിലെ സെക്കന്ററി നിയന്ത്രണങ്ങൾ ആക്ടിവേറ്റ് ആകുമെന്നും കരുതപ്പെടുന്നു. സവിശേഷതകൾ നിരവധിയുണ്ടെങ്കിലും ഈ പുതുയുഗ വാഹനം എന്ന് പുറത്തിറക്കം എന്നതിനെക്കുറിച്ച് ഫോർഡ് സൂചനകളൊന്നും നൽകിയിട്ടില്ല.