ഇനി ചാർജ് തീരുന്ന പ്രശ്നമില്ല ; മാറ്റി വയ്ക്കാവുന്ന ബാറ്ററിയുമായി ഹോണ്ട ആക്ടിവ ഇലക്ട്രിക് എത്തി

ഇലക്ട്രിക് സ്കൂട്ടർ പ്രേമികൾ ഏറെ ആകാംക്ഷയോടെ കാത്തിരുന്ന ഹോണ്ട ആക്ടിവ ഇലക്ട്രിക് പുറത്തിറങ്ങി. മാറ്റിവയ്ക്കാവുന്ന ബാറ്ററി എന്ന വമ്പൻ സവിശേഷതയും ആയാണ് ഹോണ്ട ആക്ടിവ ഇലക്ട്രിക് എത്തിയിരിക്കുന്നത്. മുൻകൂട്ടി ബുക്ക് ചെയ്ത ഉപഭോക്താക്കൾക്ക് ഇപ്പോൾ പുതിയ വാഹനങ്ങളുടെ വിതരണം ആരംഭിച്ചിട്ടുണ്ട്. 1,17,000 രൂപ മുതലാണ് വാഹനത്തിന്റെ എക്സ് ഷോറൂം വില ആരംഭിക്കുന്നത്.

രണ്ട് വേരിയന്റുകളിലാണ് ഹോണ്ട ആക്ടിവ ഇലക്ട്രിക് പുറത്തിറക്കിയിട്ടുള്ളത്. ആക്ടിവ ഇ സ്റ്റാൻഡേർഡ്, ആക്ടിവ ഇ റോഡ്സിങ്ക് ഡ്യുവോ എന്നീ രണ്ട് വേരിയന്റുകളാണ് ലഭ്യമായിട്ടുള്ളത്. ഡിസ്‌പ്ലേയും കണക്റ്റിവിറ്റി സവിശേഷതകളുമാണ് ആക്ടിവ ഇ സ്റ്റാൻഡേർഡും ആക്ടിവ ഇ റോഡ്‌സിങ്ക് ഡ്യുവോയും തമ്മിലുള്ള പ്രധാന വ്യത്യാസം. രണ്ട് വേരിയന്റുകളിലും പരസ്പരം മാറ്റാവുന്ന 1.5kWh ബാറ്ററി പായ്ക്കുകൾ ആണ് പ്രധാനമായുള്ള പൊതു സവിശേഷത. ഇത് പൂർണ്ണമായി ചാർജ് ചെയ്താൽ 102 കിലോമീറ്റർ മൈലേജ് ഉറപ്പ് നൽകുന്നതാണ്.

ആക്ടിവ ഇ സ്റ്റാൻഡേർഡിന് 5 ഇഞ്ച് ടിഎഫ്ടി ഡിസ്പ്ലേയുണ്ടെങ്കിലും സ്മാർട്ട്ഫോൺ കണക്റ്റിവിറ്റി ഇല്ല എന്നുള്ളത് ഒരു പോരായ്മയാണ്. എന്നാൽ ആക്ടിവ ഇ റോഡ്‌സിങ്ക് ഡ്യുവോയ്ക്ക് 7 ഇഞ്ച് TFT ഡിസ്‌പ്ലേ, സ്മാർട്ട്‌ഫോൺ കണക്റ്റിവിറ്റി, ലൈവ് ട്രാക്കിംഗ്, നാവിഗേഷൻ, കോൾ/എസ്എംഎസ് അലേർട്ടുകൾ, മ്യൂസിക് കൺട്രോൾ, OTA അപ്‌ഡേറ്റുകൾ എന്നീ സവിശേഷതകൾ സജ്ജീകരിച്ചിട്ടുണ്ട്. ആക്ടിവ ഇ സ്റ്റാൻഡേർഡിന് എക്സ് -ഷോറൂം വില 1,17,000 രൂപയാണ്.
ആക്ടിവ ഇ റോഡ്‌സിങ്ക് ഡ്യുവോയ്‌ക്ക് 1,51,60 0 രൂപയാണ് എക്സ് ഷോറൂം വില.