പോർട്ട് ബ്ലെയർ : ആൻഡമാൻ നിക്കോബാർ ദ്വീപുകളിൽ പോർട്ട് ബ്ലെയറിലെ വീർ സവർക്കർ ഇന്റർനാഷണൽ എയർപോർട്ടിലെ പുതിയ ഇന്റഗ്രേറ്റഡ് ടെർമിനൽ കെട്ടിടം നാളെ പ്രധാനമന്ത്രി നരേന്ദ്ര മോദി ഉദ്ഘാടനം ചെയ്യും. കേന്ദ്ര വ്യോമയാന മന്ത്രി ജ്യോതിരാദിത്യ സിന്ധ്യയും ഉദ്ഘാടനചടങ്ങിൽ പങ്കെടുക്കും.
ആൻഡമാൻ നിക്കോബാർ ദ്വീപുകളുടെ പ്രത്യേക ഭൂപ്രകൃതിയും സമുദ്രഭംഗിയും പ്രതിഫലിപ്പിക്കുന്ന രീതിയിൽ ഒരു ചിപ്പിയുടെ ആകൃതിയിലാണ് ഈ പുതിയ ടെർമിനൽ ഒരുക്കിയിരിക്കുന്നത്. 40,837 ചതുരശ്ര മീറ്റർ വിസ്തൃതിയിലാണ് ഈ പുതിയ ടെർമിനൽ കെട്ടിടം നിർമിച്ചിട്ടുള്ളത്. തിരക്കേറിയ സമയങ്ങളിൽ 1,200 യാത്രക്കാരെ വരെ ഉൾക്കൊള്ളാൻ പുതിയ ടെർമിനലിന് കഴിയും. പ്രതിവർഷം ഏകദേശം 40 ലക്ഷം യാത്രക്കാരെ ഉൾക്കൊള്ളാനുള്ള ശേഷിയിലാണ് കെട്ടിടം രൂപകൽപ്പന ചെയ്തിരിക്കുന്നത്.
പുതിയ ടെർമിനലിൽ ചൂട് കുറയ്ക്കുന്നതിനായി ഇരട്ട ഇൻസുലേറ്റഡ് റൂഫിംഗ് സിസ്റ്റമാണ് ഒരുക്കിയിരിക്കുന്നത്. ധാരാളം പ്രകൃതിദത്ത സൂര്യപ്രകാശം നൽകുന്ന സ്കൈലൈറ്റുകൾ ഉപയോഗിച്ചുകൊണ്ട് കൃത്രിമ ലൈറ്റിംഗിനെ ആശ്രയിക്കുന്നത് കുറയ്ക്കുന്നു. ഊർജ്ജ ഉപയോഗം കുറയ്ക്കുന്നതിനായി LED ലൈറ്റിംഗ് എന്നിവ അടക്കമുള്ള നിരവധി സുസ്ഥിര സവിശേഷതകൾ പുതിയ ടെർമിനലിൽ ഉൾപ്പെടുത്തിയിട്ടുണ്ട്.
യാത്രക്കാരുടെ സൗകര്യങ്ങൾ മെച്ചപ്പെടുത്തുന്നതിനായി തിരക്ക് ഒഴിവാക്കാൻ 28 ചെക്ക്-ഇൻ കൗണ്ടറുകൾ ആണ് പുതിയ ടെർമിനലിൽ ഒരുക്കിയിട്ടുള്ളത്. സൗകര്യപ്രദമായ ബോർഡിംഗിനും ഇറങ്ങുന്നതിനുമായി മൂന്ന് പാസഞ്ചർ ബോർഡിംഗ് ബ്രിഡ്ജുകൾ, ബാഗേജ് കൈകാര്യം കാര്യക്ഷമമാക്കാൻ നാല് കൺവെയർ ബെൽറ്റുകൾ എന്നിവയും വീർ സവർക്കർ ഇന്റർനാഷണൽ എയർപോർട്ടിലെ പുതിയ ഇന്റഗ്രേറ്റഡ് ടെർമിനലിൽ സജ്ജീകരിച്ചിട്ടുണ്ട്.
Discussion about this post