തിരുവനന്തപുരം : മുഖ്യമന്ത്രി പിണറായി വിജയൻ പ്രസംഗിക്കുമ്പോൾ മൈക്ക് തകരാറായ സംഭവത്തിൽ എഫ്ഐആർ രജിസ്റ്റർ ചെയ്ത് പോലീസ്. മുഖ്യമന്ത്രി പ്രസംഗിക്കുമ്പോൾ മൈക്കിൽ ഹൗളിംഗ് വരുത്തി സുരക്ഷാ പ്രശ്നമുണ്ടാക്കിയെന്നാണ് എഫ്ഐആറിൽ പറയുന്നത്. കേസിൽ ആരെയും പ്രതിചേർത്തിട്ടില്ല.
മുൻ മുഖ്യമന്ത്രി ഉമ്മൻ ചാണ്ടിയുടെ അനുസ്മരണ ചടങ്ങിനിടെയാണ് മൈക്ക് സാങ്കേതിക പ്രശ്നം മൂലം തകരാറിലായത്. സംഭവത്തിൽ കേസെടുത്ത പോലീസ് മൈക്കും ആംബ്ലിഫയറും വയറും കസ്റ്റഡിയിലെടുത്തിട്ടുണ്ട്. ഇന്ന് ഇലട്രിക്കൽ ഇൻസ്പെക്ടറേറ്റ് പരിശോധന നടത്തും.
വിശദമായ പരിശോധനയ്ക്ക് ശേഷം ഇലക്ട്രോണിക് ഉപകരണങ്ങൾ വിട്ടുകൊടുക്കുമെന്ന് പോലീസ് അറിയിച്ചിട്ടുണ്ട്. ശബ്ദം തടസ്സപ്പെട്ടത് മനപ്പൂർവ്വമാണോ അതോ സാങ്കേതിക തടസ്സമാണോ എന്നാകും പരിശോധിക്കുക.
അതേസമയം സംഭവത്തിൽ പരിഹാസവുമായി കോണ്ഗ്രസ് നേതാക്കൾ രംഗത്തെത്തിയിട്ടുണ്ട്. മൈക്കിനെ അറസ്റ്റ് ചെയ്യണമെന്ന ആവശ്യമാണ് സമൂഹമാദ്ധ്യമങ്ങളിൽ പരിഹാസമായി ഉയരുന്നത്.
കഴിഞ്ഞ ദിവസം അയ്യൻകാളി ഹാളിൽ കെപിസിസിയുടെ അനുസ്മരണ പരിപാടി നടക്കുന്നതിനിടെയായിരുന്നു സംഭവം. മുഖ്യമന്ത്രി പ്രസംഗിക്കുന്നതിനിടെ സെക്കൻഡുകളിലേക്ക് മൈക്ക് പ്രവർത്തന രഹിതമാകുകയായിരുന്നു. സാങ്കേതിക തകരാറെന്നാണ് കണ്ടെത്തൽ. കേരളാ പോലീസ് ആക്ട് പ്രകാരം കന്റോമെൻറ് പോലീസാണ് സ്വമേധയാ കേസെടുത്തത്. 118 E KPA ആക്ട് പ്രകാരം (പൊതുജനങ്ങൾക്ക് അപകടമുണ്ടാക്കുന്നതോ പൊതു സുരക്ഷയിൽ പരാജയപ്പെടുന്നതോ ആയ ഏതെങ്കിലും പ്രവൃത്തി അറിഞ്ഞു കൊണ്ട് ചെയ്യൽ) ആണ് കേസെടുത്തിരിക്കുന്നത്.
