ആഗോളതാപനവും സമുദ്രനിരപ്പ് ഉയരുന്നതും എല്ലാം മൂലം കടൽക്ഷോഭവും രൂക്ഷമായ വേലിയേറ്റവും ഒക്കെയായി ഇന്ന് പല ചെറിയ ദ്വീപുകളെയും കടലെടുത്തുകൊണ്ടിരിക്കുകയാണ്. എന്നാൽ ഇത്തരത്തിൽ സമുദ്രനിരപ്പ് ഉയരുന്നത് മൂലം ഒരു രാജ്യം തന്നെ കടലിനടിയിലേക്ക് ആഴ്ന്നു പോകുന്നതിനെക്കുറിച്ച് എപ്പോഴെങ്കിലും ചിന്തിച്ചു നോക്കിയിട്ടുണ്ടോ ? അങ്ങനെ ഭൂമിയിൽ നിന്നും തന്നെ ഇല്ലാതാകാൻ ഒരുങ്ങുന്ന ഒരു രാജ്യം ആവുകയാണ് തുവാലു ദ്വീപ്.
ലോകത്തിലെ ഏറ്റവും മനോഹരമായ ദ്വീപ് രാജ്യങ്ങളിലൊന്നാണ് തുവാലു. പസഫിക് സമുദ്രത്തിലെ ഓഷ്യാനിയയിലെ ഏതാനും ദ്വീപുകളുടെ കൂട്ടമാണ് ലോകത്തിലെ തന്നെ ഏറ്റവും ചെറിയ രാജ്യങ്ങളിൽ ഒന്നായ തുവാലു. ഹവായിക്കും ഓസ്ട്രേലിയയ്ക്കും ഇടയിലാണ് ഈ ദ്വീപുകൾ സ്ഥിതി ചെയ്യുന്നത്. വളരെ മനോഹരമായ ഒരു ഭൂപ്രദേശം ആണെങ്കിലും ലോകത്തിൽ തന്നെ ഏറ്റവും കുറവ് ആളുകൾ സന്ദർശിക്കുന്ന രാജ്യമായാണ് തുവാലു അറിയപ്പെടുന്നത്. എന്നാൽ ഇപ്പോൾ പുറത്തുവരുന്ന റിപ്പോർട്ടുകൾ അധികം വൈകാതെ തന്നെ ഈ മനോഹരമായ രാജ്യം ഭൂമുഖത്ത് നിന്നും അപ്രത്യക്ഷമാകാൻ സാധ്യതയുണ്ട് എന്നാണ്.
ഒമ്പത് ദ്വീപുകളുടെ ഒരു കൂട്ടമാണ് തുവാലു. ഇപ്പോൾ പുറത്തുവരുന്ന റിപ്പോർട്ടുകൾ അനുസരിച്ച് തുവാലുവിലെ ഒമ്പത് ദ്വീപുകളിൽ രണ്ടെണ്ണം ഇതിനകം തന്നെ കടൽക്ഷോഭവും തീരദേശ ശോഷണവും കാരണം ഏറെക്കുറെ കടൽ വിഴുങ്ങി കഴിഞ്ഞ അവസ്ഥയിലാണ്. പലപ്പോഴും സമുദ്രത്തിൽ ചുഴലിക്കാറ്റുകൾ ഉണ്ടാകുന്ന സമയങ്ങളിൽ തിരമാലകൾ കിഴക്ക് നിന്നും പടിഞ്ഞാറ് നിന്നും ഈ ദ്വീപുകളിലേക്ക് ആഞ്ഞടിക്കുകയും അതുവഴി വർഷംതോറും ഈ ദ്വീപുകൾ സമുദ്രത്തിലേക്ക് താഴ്ന്നു പോകുന്ന അവസ്ഥയിലുമാണുള്ളത്. റിപ്പോർട്ടുകൾ അനുസരിച്ച് ഓരോ വർഷവും ഈ ദ്വീപുകളിൽ വേലിയേറ്റം 3.9 മില്ലിമീറ്റർ ഉയരുന്നുവരുന്നുണ്ട്.
ലോകത്തിലെ ഏറ്റവും കുറവ് ആളുകൾ സന്ദർശിക്കുന്ന രാജ്യമായാണ് തുവാലു കണക്കാക്കപ്പെടുന്നത്. ഇത് ലോകത്തിലെ ഏറ്റവും ചെറിയ രാജ്യങ്ങളിൽ ഒന്നാണെങ്കിലും സ്വന്തം കറൻസിയുള്ള രാജ്യമാണെന്ന സവിശേഷതയുണ്ട്. മുൻപ് എല്ലിസ് ദ്വീപുകൾ എന്നാണ് തുവാലു അറിയപ്പെട്ടിരുന്നത്. 26 ചതുരശ്ര കിലോമീറ്റർ വിസ്തൃതിയിലുള്ള വിവിധ ദ്വീപുകളിലായി ഏകദേശം പന്ത്രണ്ടായിരത്തോളം പേരാണ് ഈ രാജ്യത്ത് ജീവിക്കുന്നത്. ചുറ്റും പവിഴപ്പുറ്റുകൾ ഉള്ള ദ്വീപുകളാണ് ഇവിടുത്തെ പ്രത്യേകത. പക്ഷേ വാസയോഗ്യമായ കരകൾ സമുദ്രനിരപ്പിൽ നിന്ന് പരമാവധി 2 മീറ്റർ മാത്രം ഉയരത്തിലാണ് സ്ഥിതിചെയ്യുന്നത് എന്നുള്ളതാണ് ഈ ദ്വീപിന് ഭീഷണി ഉയർത്തുന്നത്.
എത്തിച്ചേരാനുള്ള ബുദ്ധിമുട്ടുകൾ കാരണം വർഷത്തിൽ രണ്ടായിരത്തോളം സഞ്ചാരികൾ മാത്രമാണ് ഈ മനോഹരമായ സ്ഥലം സന്ദർശിക്കാൻ എത്താറുള്ളത്. 1943 ൽ രണ്ടാം ലോകമഹായുദ്ധസമയത്ത് അമേരിക്കൻ നാവികസേന നിർമിച്ച ഫുനാഫുട്ടി ഇന്റർനാഷണൽ എയർപോർട്ട് മാത്രമാണ് ഈ രാജ്യത്തുള്ള ഏക വിമാനത്താവളം. മികച്ച കാലാവസ്ഥയും നീല സമുദ്ര ജലത്തിന്റെ മനോഹാരിതയും വെള്ള മണൽപരപ്പുകളും ഇടതൂർന്ന് നിൽക്കുന്ന തെങ്ങുകളും എല്ലാമായി മനോഹരമായ ഈ രാജ്യം വൈകാതെ ഭൂമിയിൽ നിന്നു തന്നെ അപ്രത്യക്ഷമാകും എന്ന് പറയുന്നത് തീർത്തും ദുഃഖകരമായ കാര്യമാണ്. അതിനുമുമ്പായി ലോകത്തെ മനോഹര സ്ഥലങ്ങൾ സന്ദർശിക്കാൻ ആഗ്രഹിക്കുന്നവർ ഒരുവട്ടമെങ്കിലും കണ്ടിരിക്കേണ്ട രാജ്യം തന്നെയാണ് തുവാലു.
Discussion about this post