കുമളി: മുല്ലപ്പെരിയാര്‍ അണക്കെട്ടിലേക്ക് ഒഴുകിയെത്തുന്ന ജലത്തിന്റെ അളവ് കുറഞ്ഞതോടെ ജലനിരപ്പില്‍ നേരിയ കുറവ്. ബുധനാഴ്ച 141.7 അടിയായിരുന്ന ജലനിരപ്പ് 141.65 അടിയായി കുറഞ്ഞു. ഇതോടെ ഡാമിലെ ഒരു ഷട്ടര്‍കൂടി തമിഴ്‌നാട് അടച്ചു.
അണക്കെട്ടിലെ ജലനിരപ്പ് ഉയര്‍ന്നതോടെ പരിസര പ്രദേശങ്ങളില്‍ താമസിക്കുന്നവര്‍ ഭീതിയിലാണ്. അതിനിടെയാണ് ഒരു ഷട്ടര്‍ കൂടി അടക്കാന്‍ തമിഴ്‌നാട് തീരുമാനിച്ചത്. കൂടുതല്‍ വെള്ളം ഇടുക്കിയിലേക്ക് തുറന്നുവിട്ട് ജലനിരപ്പ് താഴ്ത്തണമെന്നാണ് കേരളത്തിന്റെ ആവശ്യം. ജലനിരപ്പ് 141 അടിയില്‍ നിലനിര്‍ത്താമെന്ന് കഴിഞ്ഞദിവസം തേനി കളക്ടര്‍ വാക്കു നല്‍കിയിരുന്നുവെങ്കിലും ഇത് നടപ്പായില്ല.
മുല്ലപ്പെരിയാര്‍ അണക്കെട്ടിലെ ചൊവ്വാഴ്ച തുറന്ന മൂന്ന് ഷട്ടറുകളില്‍ ഒരെണ്ണം ബുധനാഴ്ച അടച്ചിരുന്നു. നിലവില്‍ സെക്കന്‍ഡില്‍ 2405 ഘനയടിയാണ് അണക്കെട്ടിലേക്കുള്ള നീരൊഴുക്ക്. മുല്ലപ്പെരിയാറില്‍ അടിയന്തിര ഇടപെടല്‍വേണമെന്ന് ഡല്‍ഹിയിലെത്തിയ മുഖ്യമന്ത്രി ഉമ്മന്‍ചാണ്ടി കേന്ദ്രത്തോട് ആവശ്യപ്പെടും. കേരളത്തില്‍ നിന്നുള്ള ഏഴംഗസംഘം പ്രധാനമന്ത്രിയുമായും കേന്ദ്രമന്ത്രിമാരുമായും ചര്‍ച്ച നടത്തും.
Discussion about this post