ന്യൂഡൽഹി : ദേശീയ ചലച്ചിത്ര പുരസ്കാരങ്ങൾ പ്രഖ്യാപിച്ചു. മലയാളത്തിന്റെ സ്വന്തം ഇന്ദ്രൻസിന് പ്രത്യേക ജൂറി പരാമർശം. ഹോം എന്ന ചിത്രത്തിലെ അഭിനയത്തിനാണ് ഇന്ദ്രൻസിന് പ്രത്യേക ജൂറി പരാമർശം ലഭിച്ചത്. മികച്ച മലയാള സിനിമ ആയി ഹോം തിരഞ്ഞെടുക്കപ്പെട്ടു. ഫ്രൈഡേ ഫിലിം ഹൗസിനായി വിജയ് ബാബു നിർമ്മിച്ച ഹോം സംവിധാനം ചെയ്തത് റോജിൻ തോമസ് ആണ്.
മികച്ച നവാഗത സംവിധായകനുള്ള പുരസ്കാരം മേപ്പടിയാൻ സംവിധായകൻ വിഷ്ണു മോഹനാണ് സ്വന്തമാക്കിയത്. മികച്ച അനിമേഷൻ ചിത്രത്തിനുള്ള പുരസ്കാരവും മലയാളം സ്വന്തമാക്കി. അദിതി കൃഷ്ണദാസിന്റെ കണ്ടിട്ടുണ്ട് എന്ന അനിമേഷൻ ചിത്രത്തിനാണ് പുരസ്കാരം ലഭിച്ചിരിക്കുന്നത്. മികച്ച പരിസ്ഥിതി ചിത്രത്തിനുള്ള പുരസ്കാരവും മലയാളത്തിനാണ്. ആവാസവ്യൂഹം ആണ് മികച്ച പരിസ്ഥിതി ചിത്രം. മികച്ച തിരക്കഥയ്ക്കുള്ള പുരസ്കാരം നായാട്ടിന്റെ തിരക്കഥാകൃത്ത് ഷാഹി കബീറും സ്വന്തമാക്കി.
