ഇന്ത്യയിൽ ജനാധിപത്യപരമായി തെരഞ്ഞെടുക്കപ്പെട്ട സർക്കാരിനെ അട്ടിമറിക്കാൻ കോൺഗ്രസ് നേതാവ് രാഹുൽ ഗാന്ധി വിദേശ രാജ്യങ്ങളുടെ സഹായത്തോടെ ഗൂഢാലോചന നടത്തുകയാണെന്ന ഗുരുതര ആരോപണവുമായി ബി.ജെ.പി. ഭുവനേശ്വറിൽ വാർത്താസമ്മേളനത്തിൽ സംസാരിക്കവെ ബി.ജെ.പി ദേശീയ വക്താവും പൂറി എം.പിയുമായ സംബീത് പാത്രയാണ് രാഹുൽ ഗാന്ധിക്കെതിരെ കടുത്ത വിമർശനമുന്നയിച്ചത്. തെരഞ്ഞെടുപ്പിലൂടെയല്ലാതെ ഇന്ത്യയിൽ ഭരണമാറ്റം (Regime Change) കൊണ്ടുവരാനും രാജ്യത്ത് അസ്ഥിരത സൃഷ്ടിക്കാനും ശതകോടീശ്വരനായ ജോർജ്ജ് സോറോസിൽ നിന്നും അദ്ദേഹത്തിന്റെ അനുയായികളിൽ നിന്നും മാർഗ്ഗനിർദ്ദേശം സ്വീകരിക്കാനാണ് രാഹുൽ ഗാന്ധി വിദേശയാത്രകൾ നടത്തുന്നതെന്ന് പാത്ര ആരോപിച്ചു.
നിരവധി തവണ പരാജയപ്പെട്ട രാഹുൽ ഗാന്ധിയുടെ രാഷ്ട്രീയ ഭാവി പുനരുജ്ജീവിപ്പിക്കുന്നതിനായി കോൺഗ്രസ് രാജ്യത്തുടനീളം അരാജകത്വം പടർത്താൻ ശ്രമിക്കുകയാണെന്ന് പാത്ര കുറ്റപ്പെടുത്തി. ഭരണമാറ്റത്തിന് വേണ്ടി അക്രമങ്ങൾ ആവശ്യമാണെങ്കിൽ അതിനെപ്പോലും പിന്തുണയ്ക്കാൻ ചിലർ തയാറായിട്ടുണ്ടെന്ന് പ്രശാന്ത് ഭൂഷൺ, സഞ്ജയ് റാവത്ത്, നേഹ ബോറ എന്നിവരുടെ പ്രസ്താവനകൾ ചൂണ്ടിക്കാട്ടി അദ്ദേഹം പറഞ്ഞു. നവംബർ 1-ന് രാംലീല മൈതാനത്ത് റാലി നടത്താൻ കോൺഗ്രസും സഖ്യകക്ഷികളും പദ്ധതിയിടുന്നുണ്ടെന്നും, 1984-ലെ സിഖ് വിരുദ്ധ കലാപത്തിന്റെ വാർഷിക ദിനമായ അന്ന് നടത്തുന്ന ഇത്തരം നീക്കങ്ങൾക്ക് സിഖ് സമൂഹം തക്കതായ മറുപടി നൽകുമെന്നും ബി.ജെ.പി വക്താവ് കൂട്ടിച്ചേർത്തു.
വിജയദശമി സന്ദേശത്തിൽ പ്രധാനമന്ത്രി നരേന്ദ്ര മോദി ചൂണ്ടിക്കാണിച്ച രാജ്യത്തിന്റെ ശത്രുക്കൾ ഇത്തരക്കാരാണെന്ന് പാത്ര വ്യക്തമാക്കി. രാജ്യത്തിന്റെ അഭിമാനത്തെ മുറിവേൽപ്പിക്കുന്നവരും, സംസ്‌കാരത്തെ അധിക്ഷേപിക്കുന്നവരും, ജനാധിപത്യ സർക്കാരിനെ അട്ടിമറിക്കാൻ വിദേശത്ത് നിന്ന് നിർദ്ദേശങ്ങൾ സ്വീകരിക്കുന്നവരുമാണ് രാജ്യത്തിന്റെ യഥാർത്ഥ ശത്രുക്കളെന്ന് പ്രധാനമന്ത്രി വ്യക്തമായി നിർവ്വചിച്ചിട്ടുണ്ടെന്നും സംബീത് പാത്ര ഓർമ്മിപ്പിച്ചു.
