പ്യോങ്യാങ് : ഉത്തര കൊറിയയുടെ ചാര ഉപഗ്രഹം ഭ്രമണപഥത്തില്‍ എത്തിക്കാനുള്ള രണ്ടാമത്തെ ശ്രമവും പരാജയപ്പെട്ടു. റോക്കറ്റിന്റെ മൂന്നാം ഘട്ടത്തിലെ തകരാര്‍ മൂലമാണ് ഉപഗ്രഹം തകര്‍ന്ന് വീണതെന്ന് കൊറിയന്‍ സെന്‍ട്രല്‍ ന്യൂസ് ഏജന്‍സി (കെസിഎന്‍എ) റിപ്പോര്‍ട്ട് ചെയ്തു. അമേരിക്കയുടെ സൈനിക നീക്കങ്ങള്‍ നിരീക്ഷിക്കുകയാണ് ഉപഗ്രഹത്തിന്റെ പ്രധാന ദൗത്യം.
മെയ് മാസത്തില്‍ ഉത്തര കൊറിയയുടെ ആദ്യ ശ്രമം പരാജയപ്പെട്ടതിനെ തുടര്‍ന്നാണ് ഇന്നലെ വീണ്ടും വീക്ഷേപണം നടത്തിയത്. മല്ലിഗ്യോംഗ് 1 ഉപഗ്രഹത്തെ വഹിച്ചിരുന്ന ചോളിമ -1 എന്ന റോക്കറ്റാണ് വിക്ഷേപണത്തിന് തൊട്ടുപിന്നാലെ കടലില്‍ തകര്‍ന്നു വീണത്. ഒക്ടോബറില്‍ വീണ്ടും മറ്റൊരു വിക്ഷേപണം നടത്തുമെന്ന് കെസിഎന്‍എ അറിയിച്ചു.
വിക്ഷേപണത്തിന്റെ ആദ്യ രണ്ട് ഘട്ടങ്ങളും വിജയമായിരുന്നെന്നും മൂന്നാം ഘട്ടത്തില്‍ എമര്‍ജന്‍സി ബ്ലാസ്റ്റിംഗ് സിസ്റ്റത്തിലുണ്ടായ പിശക് കാരണം പരാജയപ്പെടുകയായിരുന്നു എന്നും റിപ്പോര്‍ട്ടില്‍ പറയുന്നു. യന്ത്ര തകരാറുണ്ടായതിന്റെ കാരണം ഉടന്‍ പരിശോധിച്ച് മൂന്നാം വിക്ഷേപണത്തിന് തയ്യാറാകുമെന്ന് കെസിഎന്‍എ വ്യക്തമാക്കി.
ഉത്തര കൊറിയയുടെ ചാര ഉപഗ്രഹ വിക്ഷേപണത്തെ ജപ്പാനും ദക്ഷിണ കൊറിയയും അമേരിക്കയും അപലപിച്ചു. ബാലിസ്റ്റിക് മിസൈല്‍ സാങ്കേതികവിദ്യ ഉപയോഗിച്ചാണ് ഉത്തര കൊറിയ മല്ലിഗ്യോംഗ് 1 വിക്ഷേപണം നടത്തിയതെന്ന് കാണിച്ചാണ് മൂന്നു രാജ്യങ്ങളും തങ്ങളുടെ പ്രതിഷേധം അറിയിച്ചത്.
‘ബാലിസ്റ്റിക് മിസൈല്‍ സാങ്കേതിക വിദ്യ ഉപയോഗിച്ചുള്ള വിക്ഷേപണങ്ങള്‍ നിരോധിച്ച് ഐക്യരാഷ്ട്രസഭയുടെ സുരക്ഷാ കൗണ്‍സില്‍ പുറപ്പെടുവിച്ച പ്രമേയം ലംഘിക്കുകയാണ് ഉത്തര കൊറിയ ചെയ്തത്’, ജപ്പാന്റെ ചീഫ് കാബിനറ്റ് സെക്രട്ടറി ഹിരോകാസു മാറ്റ്‌സുനോ പറഞ്ഞു.
ജാപ്പനീസ് സര്‍ക്കാര്‍ അടിയന്തര യോഗം വിളിച്ചിട്ടുണ്ടെന്നും വിക്ഷേപണത്തിന്റെ വിശദാംശങ്ങള്‍ ശേഖരിക്കുകയും വിശകലനം ചെയ്തുവരികയാണെന്നും അത് ലഭ്യമായാലുടന്‍ പൊതുജനങ്ങളുമായി പങ്കിടുമെന്നും അദ്ദേഹം പറഞ്ഞു.
Discussion about this post