ന്യൂഡല്ഹി : മാധ്യമപ്രവര്ത്തകന് കെ.എം. ബഷീര് വാഹനമിടിച്ച് മരിച്ച കേസില് ഐ.എ.എസ്. ഉദ്യോഗസ്ഥനായ ശ്രീറാം വെങ്കിട്ടരാമന് സുപ്രീം കോടതിയില് തിരിച്ചടി. കേസില് നരഹത്യ കുറ്റം നലനില്ക്കുമെന്ന ഹൈക്കോടതി വിധിക്കെതിരേ ശ്രീറാം നല്കിയ ഹര്ജി സുപ്രീംകോടതി തള്ളി. നരഹത്യാ കുറ്റം നിലനില്ക്കുമോയെന്നത് വിചാരണയിലാണ് വ്യക്തമാകുകയെന്ന് സുപ്രീം കോടതി വ്യക്തമാക്കി. ഇതോടെ നരഹത്യാ കുറ്റത്തിന് ശ്രീറാം വെങ്കിട്ട രാമന് വിചാരണ നേരിടേണ്ടി വരും.
സംസ്ഥാന സര്ക്കാര് നല്കിയ റിവിഷന് ഹര്ജി അംഗീകരിച്ച് കൊണ്ടാണ് ശ്രീറാം വെങ്കിട്ട രാമനെതിരെ നരഹത്യാ കേസ് നിലനില്ക്കുമെന്ന് കേരള ഹൈക്കോടതി വിധിച്ചിരുന്നത്. എന്നാല് കേസിലെ എല്ലാ വസ്തുതകളും പരിശോധിച്ച് ശേഷം നരഹത്യാ കുറ്റം നിലനില്ക്കില്ലെന്ന് സെഷന്സ് കോടതി നേരത്തെ വിധിച്ചിട്ടുണ്ടന്ന് ശ്രീറാം വെങ്കിട്ട രാമന്റെ അഭിഭാഷകന് സുപ്രീം കോടതിയില് വാദിച്ചു. നരഹത്യാ കുറ്റം ചുമത്താനുള്ള വസ്തുതകളൊന്നും കേസില് ഇല്ലെന്നാണ് ശ്രീറാമിന് വേണ്ടി ഹാജരായ സീനിയര് അഭിഭാഷകന്റെ വാദം.
എന്നാല് ഈ ഘട്ടത്തില് ഇടപെടുന്നില്ലന്ന് ജസ്റ്റിസ് സി ടി രവികുമാര് അധ്യക്ഷനായ സുപ്രീം കോടതി ബെഞ്ച് വ്യക്തമാക്കി. വിചാരണ ഘട്ടത്തില് തെളിവുകള് പരിശോധിച്ച് വിചാരണ കോടതി് നരഹത്യാ കുറ്റം സംബന്ധിച്ച് തീരുമാനമെടുക്കുമെന്നും കോടതി വ്യക്തമാക്കി.
അതേസമയം ഹൈക്കോടതി ഉത്തരവിലെ പരാമര്ശങ്ങള് വിചാരണ കോടതിയിലെ നടപടികളെ സ്വാധീനിക്കരുതെന്നും സുപ്രീം കോടതി നിര്ദേശിച്ചിട്ടുണ്ട്. സീനിയര് അഭിഭാഷകന് ആര് ബസന്തിന് പുറമെ അഭിഭാഷകന് രാകേന്ദ് ബസന്തും ശ്രീറാം വെങ്കിട്ട രാമന് വേണ്ടി സുപ്രീം കോടതിയില് ഹാജരായിരുന്നു.
2019 ഓഗസ്റ്റ് 3നു പുലര്ച്ചെ അലക്ഷ്യമായി ശ്രീറാം വെങ്കിട്ടരാമന് ഓടിച്ച കാര് ബഷീറിനെ ഇടിച്ച് തെറിപ്പിക്കുകയായിരുന്നു എന്നാണ് കേസ്.
Discussion about this post