പ്രസംഗത്തിനിടെ ഭംഗം നേരിട്ടാല്‍ ക്ഷുഭിതനാവില്ല; പൊതുപരിപാടിക്കിടെ എസ്പിജി അംഗം കുഴഞ്ഞുവീണു; പ്രസംഗം നിര്‍ത്തി വൈദ്യ സഹായം നല്‍കാന്‍ നിര്‍ദ്ദേശിച്ച് പ്രധാനമന്ത്രി; കൈയടിച്ച് സോഷ്യല്‍ മീഡിയയും

ന്യൂഡല്‍ഹി: പൊതുപരിപാടിയ്ക്കിടെ എസ്പിജി അംഗം കുഴഞ്ഞു വീണപ്പോള്‍ തന്റെ പ്രസംഗം പാതി വഴിയില്‍ നിര്‍ത്തി പ്രധാനമന്ത്രി നരേന്ദ്ര മോദി. തനിക്കൊപ്പമുള്ള ഡോക്ടര്‍മാരുടെ സംഘത്തോട് അദ്ദേഹത്തെ പരിശോധിക്കാനും വൈദ്യസഹായം നല്‍കാന്‍ നിര്‍ദ്ദേശിക്കുകയും ചെയ്തു. ഡല്‍ഹി പാലം എയര്‍ബേസില്‍ നടന്ന പൊതുപരിപാടിയ്ക്കിടെയായിരുന്നു പ്രധാനമന്ത്രിയുടെ സുരക്ഷാ ഉദ്യോഗസ്ഥരില്‍ ഒരാള്‍ കുഴഞ്ഞു വീണത്.

ചൂടിനെ തുടര്‍ന്ന് താഴെ വീണ ഇയാളെ ഉടന്‍ പരിശോധിച്ച് സഹായം നല്‍കാന്‍ പ്രധാനമന്ത്രി തന്റെ ഡോക്ടര്‍മാരുടെ സംഘത്തോട് ആവശ്യപ്പെട്ടു. കൈകള്‍ പിടിച്ച് ആളെ പുറത്തെടുക്കാനും ഷൂ അഴിക്കാനും ആവശ്യമായ സഹായങ്ങള്‍ ചെയ്ത് നല്‍കാനും മോദി മെഡിക്കല്‍ സംഘത്തോട് പറഞ്ഞു.

വീഡിയോ വൈറലായതോടെ പ്രധാനമന്ത്രിയെ അഭിനന്ദിച്ച് കൈയടിക്കുകയാണ് സോഷ്യല്‍ മീഡിയ. പ്രസംഗത്തിനിടെ അപ്രതീക്ഷിത ഭംഗം നേരിട്ടാല്‍ ക്ഷുഭിതനാകുകയോ കേസെടുക്കുകയോ മോദി ചെയ്യില്ലെന്നും സൗമ്യതയെന്തെന്ന് അദ്ദേഹത്തിനെ കണ്ടു പഠിക്കണമെന്നുമൊക്കെ ആളുകള്‍ വീഡിയോയ്ക്കു താഴെ പങ്ക് വച്ചു.

#WATCH | Delhi: Prime Minister Narendra Modi asks his team of doctors to check on a person who collapsed during his address. pic.twitter.com/Stw4eL97CW

— ANI (@ANI) August 26, 2023

അതേസമയം, ചന്ദ്രയാന്‍-3ന്റെ വിജയത്തില്‍ ഐഎസആര്‍ഓ ശാസ്ത്രജ്ഞരെ പ്രധാനമന്ത്രി വീണ്ടും ചടങ്ങില്‍ അഭിനന്ദിച്ചു. ബ്രിക്സ് ഉച്ചകോടിയ്ക്കായി സൗത്ത് ആഫ്രിക്കയിലെത്തിയപ്പോള്‍ ലോക നേതാക്കളില്‍ നിന്ന് അഭിനന്ദന പ്രവാഹമായിരുന്നെന്ന് പ്രധാനമന്ത്രി പറഞ്ഞു. വരാനിരിക്കുന്ന ജി 20 ഉച്ചകോടിയുടെ വിജയത്തിനായി പങ്കുചേരണമെന്നും പ്രധാനമന്ത്രി ആവശ്യപ്പെട്ടു.