ന്യൂഡൽഹി: അന്താരാഷ്ട്ര തലത്തിൽ ഇന്ത്യ ഇന്ന് അനിഷേധ്യ ശക്തിയായി ഉയരുകയാണെന്ന് ഇന്ത്യയിലെ യുകെ സ്ഥാനപതി അലക്സ് എല്ലിസ്. ജി20 അദ്ധ്യക്ഷ സ്ഥാനം എങ്ങനെ ഫലപ്രദമായി വിനിയോഗിക്കണം എന്ന കാര്യത്തിൽ ഇന്ത്യ മാതൃക കാട്ടുകയാണ്. തന്റെ ഔദ്യോഗിക വസതിയിൽ ഇരുന്ന് ഒരു ബ്രിട്ടീഷ് പ്രധാനമന്ത്രി ഓഗസ്റ്റ് 15ന് ‘ജയ് ശ്രീറാം‘ മുഴക്കുന്നു എന്ന് പറയുമ്പോൾ, ലോകഗതിയിൽ ഇന്ന് ഇന്ത്യയുടെ സ്ഥാനം അടയാളപ്പെടുത്താൻ വേറെ ഉദാഹരണങ്ങൾ എന്തിനാണെന്നും എല്ലിസ് ചോദിക്കുന്നു.
യുകെയിലെ വിദേശ വിദ്യാർത്ഥികളുടെ എണ്ണത്തിലും സന്ദർശകരുടെ എണ്ണത്തിലും നൈപുണ്യ വിദഗ്ധരുടെ എണ്ണത്തിലും ഇന്ത്യക്കാരാണ് മുന്നിൽ. തന്റെ ഔദ്യോഗിക വസതിയിൽ ഇരുന്ന് ഒരു ബ്രിട്ടീഷ് പ്രധാനമന്ത്രി ഇന്ത്യയുടെ സ്വാതന്ത്ര്യ ദിനത്തിൽ ‘ജയ് ശ്രീറാം‘ മുഴക്കുന്നത് മുൻപ് ചിന്തിക്കാൻ സാധിക്കുമായിരുന്നോ എന്നും എൻഡിടിവി കോൺക്ലേവിൽ എല്ലിസ് ചോദിച്ചു.
ലോകരാജ്യങ്ങളിലെ പട്ടിണി, വളർച്ചാ മുരടിപ്പ്, ദാരിദ്ര്യം എന്നിവ നേരിടുന്നതിൽ ഇന്ത്യ വഹിക്കുന്ന പങ്ക് നിസ്തുലമാണ്. യുക്രെയ്ൻ വിഷയത്തിൽ ഇന്ത്യ സ്വീകരിച്ച പക്വതയാർന്ന നിലപാട് ലോകം അംഗീകരിച്ചതാണെന്നും അദ്ദേഹം വ്യക്തമാക്കി.
അയൽരാജ്യങ്ങളോട് ഇന്ത്യ പുലർത്തുന്ന കരുതൽ ശ്രീലങ്കൻ പ്രതിസന്ധിയുടെ കാര്യത്തിൽ നാം കണ്ടു. മറ്റ് അയൽരാജ്യങ്ങളോടും ഉദാരമായ സമീപനമാണ് ഇന്ത്യ പുലർത്തുന്നത്. വെല്ലുവിളികൾ നേരിടുന്ന കാര്യത്തിൽ ക്രിയാത്മകമായ സമീപനമാണ് ഇന്ത്യ സ്വീകരിക്കുന്നതെന്നും അലക്സ് എല്ലിസ് കൂട്ടിച്ചേർത്തു.
